ATA ta invita tur esunnan interesa den e industria crucero pa participa na un tayer
Ultimo dia pa inscribi ta dia 19 di september
ORANJESTAD (AAN): Aruba Tourism Authority (ATA) y Aruba Ports Authority (APA), hunto cu Florida Caribbean Cruise Association (FCCA) ta invita tur hende y representantenan di organizacionnan interesa den e industria crucero y haci negoshi cu liñanan crucero, pa atende un tayer interesante dia 21 di september 2012.
FCCA a ofrece ATA y APA pa trece e training aki Aruba, como cu tur dos organizacion ta “Platinum Member” di FCCA.
Ultimo dia pa registra ta dia 19 di september y esunnan interesa por manda un e-mail cu e nomber di e personanan cu lo atende e training y informacion di e compania pa rosie.arends@arubaports.com.
E tayer ta gratis, cu ta hiba como tema “Shore Experiences; Profitable and Sustainable”. Esaki ta worde ofreci pa FCCA y tin como facilitado un representante di “Aquila Center for Cruise Excellence” di Canada. Meta principal di e tayer ta pa e operadornan di tour compronde kico ta e miho manera pa ofrece nos turistanan un servicio excelente.
Aquila ta un operador di tour Canades funda 30 aña pasa pa e actual presidente di e compania, Beth Kelly Hatt. Señora Kelly Hatt ta un lider den e industria crucero y a worde reconoci cu diferente premio. E tin 30 aña di experiencia den e industria di turismo y 20 aña brindando servicio na liñanan crucero.
Tur interesado cu no ta miembro di FCCA por atende e prome parti di e training, for di 9’or pa 10’or y mey di mainta. Despues di esaki ta sigui un sesion exclusivamente pa FCCA Tour Operator Members, cual ta caba 1’or di merdia.
E tayer ta dirigi na tur persona na Aruba cu ta interesa di haya sa mas di e mercado di crucero. Lo splica e rol di e puerto, destinacion, operadornan di excursion y otro partnernan cu ta importante pa haci e destinacion exitoso pa loke ta trata turismo crucero. Tambe lo duna un splicacion di e expectativanan di e liñanan crucero pa cu e puerto y con e destinacion por cumpli cu e expectativanan aki.
Aquila Center for Cruise Excellence tambe lo duna un bon splicacion tocante con e negoshi di excursion ta funciona y con e liñanan crucero ta traha hunto cu e companianan di tour na un destinacion.
Esaki ta un oportunidad unico cu no ta presenta cu frecuencia na Aruba y p’esey ATA ta invita tur interesado pa probecha di e oportunidad aki y registra awe mes!
