Booshi Wever cu mocion pa traspasa refineria pa pueblo di Aruba
Tambe pa stop entrada di mas stranhero y cambionan di LTU
ORANJESTAD (AAN): Durante e reunion den cua a discuti e situacion di nos refineria, y relacioná cu e cierre casi inevitabel di esaki – pa motibo entre otro cu otro ofertanan NO a ser considerá– mi a presenta na Parlamento dos mocion cu e meta pa purba scapa locual ainda lo por a scapa.
E prome mocion tabata encera principalmente pa e refineria y e transhipment ser traspasá pa pueblo di Aruba, pa di e manera ey e facilidad di transhipment worde maneha y opera, door di nos propio hendenan cu ya tin e debido experticio den refineria.
E di dos mocion tabata pa para procesamento di peticion y permiso entrada di mas stranhero y nan famia, ademas pa para e cambionan den e LTU.
Ta un hecho cu e benta di e refineria na cualquier cumprado, pero SIN e transhipment, NO ta viabel. Benta separá pues ta imposibel. E acuerdo cu Valero ta mustra cu atrobe gobierno ta manipulando cu pueblo, pasobra e acuerdo aki ta stroba e benta di e refineria.
E hecho cu sr. Otmar Oduber a bisa cu Valero a bisa cu pa e terminal lo tin solamente 1 (un) persona di afo cu permiso lo ser pidi p’e – pa ser mas exacto, uno pa un “financial controller” – ta un prueba cu nos propio hendenan por maneha e ‘transhipment facility” aki, y lo por haci un posibel benta hopi mas viabel.
Y si esaki no worde concretisa, lo por cuminza traha riba un desaroyo nobo pa e area aki.
Principalmente e di dos mocion tin e meta pa tene posibel cuponan di trabao por lo pronto habrí pa e empleadonan di Valero. Mi ta spera di haya aprobacion unanime di Parlamento pa ambos mocion.
