Caso di ladron mata na Hulanda durante cu e tabata horta, a lanta basta discusion

Publication: Thursday, 27 September 2012. Categoria: General

ORANJESTAD   (AAN): Algun dia pasa un homber cu a drenta den un cas na Hulanda pa horta, a haya su mes den un confrontacion cu e dos habitantenan di e cas.

Durante e pelea cu a tuma lugar, e ladron a perde su bida.

E asunto aki a lanta basta discusion na Hulanda y Aruba tambe, pasobra algun tempo atras a bin un adaptacion di ley pa Aruba cu ta conta pa Hulanda tambe, cu ta bisa cu bo por uza algun forza contra un persona cu drenta bo cas cu intencionnan malo, pa defende bo famia y bo propiedad.

Na Hulanda despues cu a constata morto di e ladron, e pareha cu ta biba den e cas mester a bay warda di polis unda lo worde determina si nan lo worde persigui penalmente of no.

Antes e ley tabata asina cu si un hende drenta bo cas cu intencionnan menos bon y bo maltrata of mata e persona aki, bo ta worde deteni mesora y bo ta worde persigui penalmente.

E cambio di ley ta pone cu den e mesun caso bo no ta worde deteni mesora.

Autoridadnan a base di e situacion y circumstancianan tin cu determina si bo ta bay worde deteni y persigui of no.

Ministerio Publico di Aruba mes a trece dilanti sinembargo cu hopi hende ta mal interpreta e ley.

Tin hende cu ta kere cu e ley ta pone cu awor si un hende bin horta den bo cas y bo mata e persona, bo no ta bay worde persigui penalmente.

Esey no ta berdad.

Investigacion di e autoridadnan ta bay determina si e forza cu bo a uza contra e persona tabata necesario of no.

Nan mester por determina si berdad bo a actua den defensa propio.

Na Hulanda e ley ta mescos.

Despues di e incidente na Hulanda unda cu e ladron a worde mata, un di e habitantenan di e cas mester a worde transporta pa hospital prome, door cu e tabata tin algun herida na su curpa.

Esaki quizas lo yuda den su caso, pa mustra cu e forza cu el a uza tabata necesario pa proteha su mes y su pareha.

Prensa Hulandes a papia cu algun di e bisiñanan di e pareha y nan a bisa cu e hendenan ta hende hopi trankil.

Tur hende cu a papia cu prensa tabata di opinion cu e hendenan aki a actua na un manera corecto.

Nan a bisa cu hendenan mester keda cu nan mannan for di propiedad y pertenencianan di otro hende.

Algun a bisa den direccion di e ladron difunto: “Eigen schuld, dikke bult”.

One Response to 'Caso di ladron mata na Hulanda durante cu e tabata horta, a lanta basta discusion'

  1. September 27, 2012 at 10:22 am
    Pascual Ras

Leave a Reply