Den pasado Universidad di Aruba a worde evalua y mester upgrade su mes pero poco a worde haci
Universidad di Aruba mester kibra cu e secrecia!, segun Frank Zaandam
ORANJESTAD (AAN): drs. Frank Zaandam, un persona cu hopi conocimento riba tereno di Curriculum den entrevista cu DIARIO a duna di conoce su punto di bista riba e expresionnan di Dr. Eva Latham durante apertura di Aña Academico na Universidad di Aruba.
Sr. Zaandam tabata hopi cla ora el e splica cu na Universidad di Aruba tin cierto gapnan pa loke ta e parti di formacion academico-cientifico, cual no ta existi na UA.
Zaandam a declara cu tin un discrepancia existente na UA. Na UA tin un centro cu ta ser yama centro di investigacion. “Netamente un centro di investigacion, su encargo internamente ta cu e ta provee henter e universidad, e materianan (cientifico) cu mi a menciona anteriormente, cual Universidad di Aruba no tine”.
Akinan Sr. Zaandam ta referi na teoria di ciencia cu na Hulandes ta ser yama “wetenschap theorie”. Tambe na “wetenschap filosofie” y “wetenschap ethiek”. Ni un di e terenonan academico aki, no ta forma parti di e curriculum di Universidad di Aruba, Sr. Zaandam a splica.
E personanan cu ta gradua na universidad, nan tesisnan mester cumpli cu e criterianan ey pa medio di e centro di investigacion. Esey absolutamente no ta pasa na universidad. Segun Frank Zaandam, esey ta algo cu UA mester bay rectifica y reconoce si nan kier hisa nan calidad.
Na UA no tin un programa di certificacion ni interno ni externo. A agrega cu den pasado UA a worde evalua y mustra riba esey, pero poco a worde haci. “Eynan Universidad di Aruba mester kibra cu e secrecia”, a bisa.
Segun Zaandam, e ta na altura cu UA a haya raportnan riba e tereno ey, pa nan upgrade nan mes, tanto interno como externo, pero esey no ta riba pia ainda. Esaki ta ocasiona cu e formacion academico ta trece cune den practica algun problema. “Mi mes ta na altura di dje”, a enfatiza.
A lanta facultadnan nobo, por ehemplo di Arts & Science, caminda a bin cu cursonan manera esun di Bachelor den Organizacion, Gobernacion y Management, cu ta un curso di Universidad di Utrecht y Utrecht kier a yuda UA pa setup e curso.
Ora cu Universidad di Utrecht a mira cu e opleiding no tabata cuadra cu e standardnan academico di e cursonan cu nan tin na Utrecht, nan a bisa cu nan no por tin envolvimento den esey, a señala.
Akinan por mira ki consecuencia negativo esaki por tin. “Ta imperativo pa Universidad di Aruba traha ariba e tereno aki di certificacion tambe”, Frank Zaandam a mustra.
