Decisionnan increible na Aruba!
ORANJESTAD (AAN): Hopi biaha bo ta pensa si acaso hendenan cu a sigui un educacion avanza pa ocupa puestonan importante cu ta deal cu hende, sa haci uso di nan sentido comun ora di tuma decision.
Imaginabo cu e siman aki, hendenan a perde nan trabao djis debi na un miserable pida bolo chikito. Esaki a socede den e siglo moderno aki na Aruba.
Un trahador femenino di Oficina, ehemplar y dedica na su trabao, y kende tin mas di 10 aña den servicio di un Lowrise Resort na Aruba, tabata canando y a pasa den area di Cushina, y aki a djis duna comentario cu e dia ey e no tabatin hopi cos di come, y ainda tin hopi hamber mes y dolor di cabez.
Aki un trahador femenino di e parti di Pastry, a haya un tiki pica di e trahador, y a dicidi na corta djis un pida slice chikito di un bolo, pa asina e por come eynan mes pa por calma e hamber y e dolor di cabez.
Ora bo curpa no a digesti hopi carbohidrato, bo curpa ta reacciona dunando bo dolor di cabez.
Pero e trahador di oficina no a come e pida bolo, y a dicidi pone den su tas y kier a bay cune su cas. Aki el a worde gara door di Security.
Loke el a haci aki ta contra reglamento di mayoria Hotel na Aruba.
Pero envez di a djis haya un ‘advertencia’ of un ‘warning’, esnan di Recurso Humano a djis retira e trahador di oficina aki. Y esey no ta tur, pasobra nan a retira tambe e trahador di pastry. E tambe tin hopi aña di fiel trabao na e empresa.
Dos mama di famia, inesperadamente y den temporada di Pasco, awor sin empleo y tur esey pa un miserable bolo.
Bolo cu constantemente na monton ta worde tira afo despues cu nan a bira 3 dia bieu den cooler.
E informe aki a crea varios reaccion den pueblo, pasobra loke e dos trahadornan aki a haci ta nada cu ta cay den categoria di ‘crimen’. Uno a djis ofrece un pida bolo di su bon boluntad. E otro a djis pensa kizas cu un pida bolo lo no causa problema.
Un experto a bisa cu legalmente e Resort por haci esey, esta di duna nan retiro. Pero e ta haya cu loke a worde haci, ta un tiki severo! Mihor por a djis duna un advertencia serio, of un siman di expulsion, pa asina nan sa con grave e situacion ta.
“A perde trabao djis pa un bolo? Si acaso tabata un pida Angus Steak, of si acaso el a subi caya bende e bolo, esey kizas por tabata serio,” un persona a indica.
Mester aplica ley igual pa tur hende. Que hubo ora turistanan na cantidad ta bira victima di robo den parkinglot cu nan V-auto? Of di nan cambernan? Di con no ta retira Security Guards cu no a haci nan trabao e ora ey? Pero awor pa un miserable pida bolo, dos hende ta bay keda den e lunanan aki prome cu December sin salario.
