FADA cu programa preventivo pa Kleuterschool y Schoolnan Basico
Ademas di buki pa mayor y docentenan:
ORANJESTAD (AAN) – Den conferencia di prensa yama pa Fundacion Anti Droga Aruba (FADA), señor John van der Biezen a introduci un buki nobo, yama “E realidad di droga y alcohol: DICIDI!”
E buki aki ta totalmente na Papiamento y e ta menciona tur e tiponan di droga cu tin na Aruba, y e ta un guia pa mayor y educadornan, pa asina nan por sinta hunto cu nan yiu y alumnonan respectivamente, y pasa door di e tur sorto di droganan aki.
E buki ta presenta testimonionan di varios persona local cu a biba den e mundo di adiccion y cu a pasa den diferente trayectoria y a uza casi tur e droganan aki y ta conta con nan experencianan tabata cu esaki.
E buki sin duda lo yuda den e parti preventivo cu ta e trabao cu FADA ta desplega.
Tambe e buki ta menciona tur instancia cu ta traha den prevencion di droga y den e parti curativo. E buki ta gratuitamente duna y mayornan y docentenan por adkiri e na FADA mes.
Van der Biezen a comenta cu un esfuerzo grandi tin tras di e buki aki, unda cu FADA a acerca diferente instancia internacional, cu cualnan e fundacion ta traha diariamente, pa busca informacion, entre otro Trimbos Institute. Pues, e ta un material concreto y basa riba datonan cientifico.
E buki aki a wordo financia pa Cede Aruba na cual FADA a yama un danki hopi grandi. A wordo edita un total di 2500 buki, y su portada a wordo diseña pa Shaitza Olivieira y Jean Mark Gomes.
Sharmine Maduro-Lopez, Preventie Medewerker Na FADA, a elabora riba e proyecto pa Kleuterschool y School Basico.
El a menciona cu aña pasa FADA a bin cu un programa preventivo na nivel di kleuterschool, pasobra for di e nivel aki mester siña e mucha caba con pa tuma e decision.
Sharmine a señala cu e persona mes ta scoge entre consumi droga of biba un bida sin droga. Pesey mes e fundacion a dicidi pa bin cu un programa den kleuterschool, y esaki no ta bay un bez so na school pero e tin continuidad, y pa tal motibo nan tin material nobo cu nan a haya danki na un sponsor.
El a haci un yamada na tur Kleuterschool pa yama FADA pasobra nan tin programanan nobo y nechi cu mas cu un biaha nan por wordo pidi pa bin, y esaki ta a base di popchinan (poppenkast) e muchanan tocante droga y specificamente riba escogencia, na e muchanan siña con pa haci esaki den nan bida, pasobra na final ta e decision cu e mucha of hoben ta tuma lo determina di e ta biba un bida usando droga of un bida liber di droga.
Tambe tin un programa pa schoolnan basico. Semper FADA tabata tin un programa pa school basico pero cuminzando na 5de klas. Pero mirando e problema di droga unda tin mucha di ocho aña caba cu ta consumi esey, nan a dicidi pa acerca esnan mas chikito. Pesey e programa aki ta cuminza awor for di Eerste Klas te cu 6de klas.
Cada programa ta traha hunto cu un Pedagogo, kiermen e ta traha riba un nivel y e ta progresivo, basa riba storia, drama, y ta conta riba e droganan legal y ilegal. Nan ta abarca tambe programanan educativo y pa medio di wega. Sharmine Maduro a haci un yamada pa tur school pa laga FADA drenta pa duna e alumnonan e informacion corecto, pasobra ta un realidad cu e muchanan ta haya informacion pafo cu no ta e realidad.
Sharmine a agrega cu e mensahe ta yega y cu e muchanan ta siña e cantica di FADA cu ta parti di e programa, y tin biaha nan ta conta nan historia y ta asina cu hopi di nan ta biba e problema aki na cas, nan ta mira e mayornan consumi y nan ta lanta cu e creencia cu e ta algo normal, locual no ta.
Tambe e muchanan ta hiba e mensahe na cas y ta bisa e mayornan cu alcohol y droga ta malo.
