Home Politica Liña grandi di MEP tabata simplemente un atake frontal contra Valero

Liña grandi di MEP tabata simplemente un atake frontal contra Valero

0
0
SHARE
- Advertisement -

Ayera den Parlamento di Aruba supuestamente tratando futuro di trahadornan di Valero:

ORANJESTAD    (AAN):    Ora cu hopi hende, specialmente trahandornan di Valero, a kere cu Parlamento di Aruba lo bay trata asuntonan cu ta na beneficio di e trahadornan di e refineria, e situacion a tuma un buelta straño.

Pero asina cu e prome orador di fraccion geel a tuma e microfoon, por a mira un tendencia hopi preocupante y negativo.

    For di algun dia atras caba, representantenan di trahadornan di Valero, abogadonan y sindicato, a haci un suplica na parlamento pa no crea un issue politico di e asunto aki, pasobra e lo no ta na beneficio di e trahadornan y ni di un posibel benta di e refineria.

E ultimo aki ta algo cu ainda ta un posibilidad real. Cu MEP tin un ‘appeltje te schillen’ cu Valero, tabata algo hopi evidente durante un reunion.

    E instigacion contra e partner strategico di Aruba aki a bay te na e nivelnan di mas abou cu por tabata tin. Esey tabata e liña grandi di e miembronan di e fraccion geel cada biaha cu nan tabata na palabra. Hunto cu e atakenan frontal, tambe por a tende expresionnan cu a demostra di tabata hopi inbalansa (pa no usa otro palabra mas pisa).

    Un ehempel tabata ora cu sr. Briesen di fraccion di MEP, cu durante un etapa di e reunion cu su stem tabata hopi halsa, a cuminsa insinua algun cosnan basta for di sla relaciona cu e doño di e refineria na San Nicolas. A bay asina leu cu Sr. Briesen a tilda Valero di kier a stop of kibra Carnaval. Algo cu a pone hopi den e parlamento para un rato y purba digeri cu atencion si loke nan a tende ta cuadra cu realidad. Como si fuera cu esey tabata poco, e parlamentario, para banda di su lider di fraccion, a referi na Valero bisando “ora cu bo kier bin deal cu nos, bo mester ta di goeie huize.”

    Aparentemente, e parlamentario ta insinuando cu nan no ta ken cu ta, cu nan tin opinionnan grandioso di nan mesun status y/of nan no ta negocia cu ken cu ta. Tur esaki a bay compaña cu gritamento y harimento for di e miembronan di e fraccion geel. Tur esaki durante di un reunion cu tabata tin como meta pa evita e situacion di incertidumbre cu e trahadornan di Valero ta aden na e momentonan aki. Algo hopi serio! Un poco despues mayoria di representantenan di trahadornan di Valero y e trahadornan di Valero mes a cuminsa bandona e sala. Atras a keda algun candidato di partido MEP, lidernan di aña y algun otro sostenedor di e partido geel cu tabata haci nan maximo esfuerso pa perturba e desaroyo di e reunion. Pero e atakenan no a keda limita na expresionnan di apariencia inbalansa di Sr. Briesen so.

     Señora Xiomara Ruiz, den voz halto a cuminsa expresa cu e unico cos cu Valero a bin haci na Aruba ta “chica e pais aki.” Siguientemente sr. Adi Thijsen, a relata un storia caminda cu e ta bisa cu Valero lo a kita crudo cu Aruba lo a haya for di Mexico y hiba esaki Merca. Pero sin duda e momento mas iluminante di e reunion, tabata ora cu lider di fraccion di MEP a lanta para y grita sin paracion. Esaki aparenetemente despues cu Parlamentario Melvin Tromp a recorda durante su discurso cu tempo cu a trata ‘Settlement Agreement’ den Parlamento, pa asina por a habri e refineria back, despues cu e tabata sera pa algun aña, e lider actual di MEP sali for di sala di Parlamento pa bay un fiesta familiar.

    E ultimo aki a mustra di no tabata un recuerdo mucho agradabel pa señora Wever-Croes. Pero cualkier cumprador serio pa e refineria, por ehempel PetroCHina, incluyendo Valero y otro inversionistanan, mester por ta hayando un impresion masha dudoso di nos pais, siguiendo e desaroyonan di e fraccion geel den Parlamento di Aruba.

     E partido geel, mester cuminsa pone man riba nan mesun cabes y cuminsa wak si nan weganan strategico por ta haciendo mas daño cu bon na nos pais. Pa un partido, na nomber di un pais, ta den guerra constante cu tur hende, partnernan den Reino, partnernan strategico y inversionistanan no por ta bon. E no por ta e direccion cu un partido cu e historia y trajectoria di partido MEP por kere cu por beneficia su mes y pais Aruba. Un di dos mester sufri y esun cu ta sufri sigur ta pais Aruba y su imagen den Reino y den exterior.

    E partido mes, ta mustrando di no tin un direccion fiho y cla di unda pa bay. Por ta nan mester cuminsa un proceso di wak paden y drecha nan mes, prome cu nan por haya un direccion positivo pa tanto Aruba y nan mesun partido, cordando cu uno ta mas importante cu e otro!

- Advertisement -

DUNA COMENTARIO

Please enter your comment!
Please enter your name here