Ministernan a reuni cu casi 100 compania pa reubicacion di empleadonan di Valero

Publication: Friday, 14 September 2012. Categoria: General

ORANJESTAD:(AAN) Entre diamars y diahuebs, Minister di Asuntonan General, hunto cu Ministernan Otmar Oduber y ing. Mike de Meza a dedica na un serie di reunion cu diferente organo y instituto di Aruba pa papia riba e tema di Valero y yega na posibel acuerdonan pa beneficia e trahadornan cu no lo sigui mas cu e compania den su proximo fase.

E reunionnan a tuma luga den Renaissance Conference Center y a conta cu participacion di tur esnan yama.

   E meta tras di e iniciativa aki di Gabinete Mike Eman ta pa bin cu opcionnan cu lo facilita e proceso di transicion; no solamente alternativanan pa loke ta cupo di trabao, pero tambe facilidad pa cumpli cu nan compromisonan financiero mientras cu ta haya stabilidad back.

Esaki ta un accion adicional di contingencia mientras cu e proceso ta sigui pa concretisa un benta di e refineria cu otro operador y di e manera ey garantisa e continuacion di labor di tur su empleadonan.

   E reunionnan entre e Ministernan menciona ta un intercambio di informacion y idea cu 100 di e empresanan publico y priva cu mayor potencial di por haci diferencia den e situacion.

Diamars atardi a sinta cu representantenan di companianan di construccion sigui pa banconan, Aruba Tourism Authority, Banco Central di Aruba, IMSAM, entre otro. E prome dia di reunion a clausura cu e encuentro cu companianan N.V. di Gobierno manera Aruba Airport Authority, NV Elmar y Aruba Ports Authority, pa menciona algun.

   Ya caba for di prome dia, Prome Minister Mike Eman a duna di conoce cu di parti di banconan a manifesta e boluntad di por sinta individualmente cu e empleadonan di Valero cu tin obligacionnan financiero pa ofrece na nan un flexilidad unico. E entidadnan tin comprension pa e situacion y ta dispuesto pa yega na acuerdonan favorabel.

Adicionalmente e mandatario a indica cu den cada presentacion cu nan duna, a keda estableci e hecho cu e trahadornan di Valero ta representa un forsa laboral consistiendo di personanan sumamente capacita. Ta trata di un grupo di empleado cu ta conta cu tanto e conocemento como experiencia necesario pa enrikece cualkier compania of entidad local.

   Durante e proceso aki di presentacion, naturalmente lo bin dilanti preguntanan di parti di e compania y gruponan invita. Pa facilita e aspecto aki di e combersacionnan y duna e miho informacion posibel, Gobierno ta conta cu e asistencia y experticio di Sr. Paul Arends, kende conoce di cerca e personal di Valero y nan capacidad.

Den tur esaki, nos Prome Minister no ta descarta cu por yega na un solucion ainda mas bentahoso pa un y tur; cu lo ta e continuacion di e funcionamento di e refineria pa medio di su benta cu un operador nobo. Negociacionnan no a stop y “entre awo y fin di aña tin un bentana di oportunidad pa logra un partner of cumprado,” Premier Mike Eman a indica.

Leave a Reply