Home Hudicial Murray nunca a ricibi tratamento pa su problemanan mental y pafo di...

Murray nunca a ricibi tratamento pa su problemanan mental y pafo di prison no tin bon structura pe

3
0
SHARE
- Advertisement -

Puntonan di P.G na Curaçao pa no laga Murray bay:

ORANJESTAD    (AAN): Manera DIARIO a publica, James Clifton Murray kende 33 aña pasa a abusa di un mucha y a asesina e mesun mucha aki, a biaha pa Curaçao recientemente, pa ta parti di tratamento di un caso den cual lo worde determina si e preso aki cu a haya e castigo di bida largo, lo por worde laga den libertad condicional despues di 33 aña.

E procurador general interino tabata esun kende di parti di O.M a atende cu e caso na Curaçao.

El a trece puntonan dilanti cu ta indica cu O.M no ta haya cu Murray mester worde permiti di drenta back den comunidad.

Segun e P.G interino, den un caso asina mester evalua kico libertad di Murray lo nifica entre otro pa famianan di e victima y pa comunidad en general.

Tambe husticia hof mester pensa riba e chens cu Murray lo por comete mesun tipo di crimen atrobe, of otro crimen serio.

E puntonan aki a worde considera den e veredicto di huez cu a cay riba 11 di Maart 1980.

Un di e motibonan cu a duna Murray bida largo, tabata pa proteha comunidad  contra dje.

Locual hof a considera tambe e tempo ey ta cu no tabata tin y ainda no tin dentro di nos islanan, un sistema adecuado pa trata personanan cu e problemanan mental di personalidad cu Murray tabata tin y muy probablemente tin ainda.

E P.G interino durante tratamento di e caso na Curaçao a bisa cu mirando cu no tabata tin e opcion di un castigo largo hunto cu un periodo largo di tratamento psiquiatrico pa Murray, bo por bisa cu corte e tempo ey a haci uso di e di dos mihor opcion, cu ta cera e persona pa bida largo, pasobra no tabata tin ningun otro posibilidad di proteha comunidad debidamente contra Murray.

Un di e criterianan importante tambe den e evaluacion si e criminal por worde laga den libertad, ta e posicion di famia di e victima.

Castigo ta un aspecto importante, pero tambe locual e famianan y comunidad en general ta sinti.

E tempo cu el a ricibi e castigo y awor tampoco segun e P.G, Murray no a mustra su remordimento pa locual el a haci.

E P.G a sigui trece dilanti cu e falta di inteligencia di parti di Murray lo por pone hende pensa cu ta door di esey e no ta mustra cu e ta lamenta locual el a haci debidamente.

Pero e falta di inteligencia aki tambe por ilustra e hecho cu  Murray quizas no ta realiza bon e tremendo dolor, tristeza y shock cu el a causa cu su actonan.

E realizacion aki di parti di Murray ta importante pa por determina si e lo por comete un horibel crimen atrobe.

Pesey O.M su punto di bista ta cu si laga Murray den libertad, esey lo causa un shock hopi grandi den comunidad y specialmente pa famia di e victima.

E investigacionnan psiquiatrico di Murray ta mustra cu e tin cierto combinacion di caracteristicanan di personalidad cu por hacie hopi peligroso.

Su nivel abao di inteligencia combina cu su problemanan mental tin un efecto grandi riba e chens pa e comete mesun tipo di crimen atrobe.

O.M ta realiza cu den prison Murray a comporta su mes bon.

Segun e P.G interino, esey a logra door cu den prison tin un bon structura.

Pafo di e prison no lo tin structura mas, excepto si esey worde bon regla.

Actualmente sinembargo e hecho cu su mama di 80 aña kier tume den su cas y su ruman muher kier yuda financieramente, no ta un garantia cu tur cos lo cana bon, segun e P.G.

Mirando su personalidad, tur cos ta indica cu pafo di prison e lo no por tin un relacion normal cu hende, mirando tambe cu lamentablemente nunca el a worde trata pa su problemanan mental.

P.G mirando tur e puntonan aki a sugeri na hof pa nan no laga Murray Sali liber.

Dentro di algun siman e hueznan di hof lo duna di conoce locual nan a dicidi den e caso aki.

- Advertisement -

DUNA COMENTARIO

Please enter your comment!
Please enter your name here