Peticion pa Proteccion di Areanan di Naturalesa entrega na Parlamento
ORANJESTAD (AAN): Den fin di siman, e organizacion local di Aruba Birdlife Conservation a entrega un peticion na Presidente di Parlamento drs. Paul Croes pa cierto areanan particular di naturalesa ta protegi y pa haci esakinan parti di Parke Arikok.
E peticion aki a keda entrega a base di un peticion di parti di diferente fraccionnan den Parlamento, durante e presentacion di Bird life Conservation den e Bijeenkomst informativo riba e parke di molina di biento.
Presidente di Parlamento di Aruba, drs. Paul Croes, a recibi drs. Greg Peterson, Presidente di Aruba Birdlife Conservation den su despacho na unda sr. Peterson tabatin e oportunidad di splica mas e peticion.
Maneho di Gobierno ta basa riba ‘Going Green’. “Going Green” no solamente ta inclui facetanan di energia berde, sino tambe medio ambiente y proteccion di nos naturalesa. E programa di Gobierno riba tereno di energia Berde ta den ehecucion. Asina Gobierno a tuma pasonan pa para dumpnan ilegal y tambe tira sushi unda cu ta.
Den e pensamento di Gobierno pa ta mas sostenibel y mas berde, mester tin mas enfasis riba proteccion di nos naturalesa. Den practica e balanse entre desaroyo di proyectonan y contruccion, versus cuido y mantencion di nos herencianan natural, completamente den desbalance y esaki den contra di e e naturalesa.
Aruba Birdlife Conservation ta boga pa tal motibo pa e siguiente areanan por haya formalmente un status specifico di proteccion. Esaki nan ta; California Duinen, Important Bird Area (IBA) Tierra Del Sol, Saliña Malmok, Saliña Palmbeach, Bubaliplas (IBA), Sero Teishi, Spaans Lagoen (Ramsar teritorio) y Mangel Halto, Rooi Bringamosa, Rooi Taki, Rooi Manoonchi, IBA Rifeilanden Oranjestad, Mangrove gebieden, Rooi Lamunchi, Saliña Sabaneta, IBA Rifeilanden San Nicolas y tambe un area (strook) na lama na Sero Colorado.
Aruba Birdlife Conservation ta contento cu diferente fracionnan den Parlamento a haci e peticion pa oficialmente haci e peticion na Parlamento y ta spera cu Parlamento lo honra e peticion di e Fundacion pa salba areanan pa nos futuro generacionnan.
Presidente di Parlamento Paul Croes como un persona cu ta kere den proteccion y conservacion di nos naturalesa, a ricibi esaki den nomber di Parlamento di Aruba, y na un dado momento pone esaki na discussion den Parlamento.
