Home General Prome Minister Eman hopi preocupa cu tono uza pa oposicion por yega...

Prome Minister Eman hopi preocupa cu tono uza pa oposicion por yega te na San Antonio

1
0
SHARE
- Advertisement -

Premier a splica kico a pasa cu Petrochina:

ORANJESTAD (AAN) – Matutino DIARIO a acerca Prome Minister mr. Mike Eman, tocante e ciere di e operacionnan di Refineria Valero riba nos Isla, y esaki despues di un reunion hopi importante cu a tuma lugar den Parlamento.

Prome Minister a expresa cu e empeño cu Gobierno a haci pa Aruba su refineria keda habri a worde demostra caba cu su reapertura poco despues cu el a asumi e mando.

E dignatario a repasa riba loke a sosode entre 2009 y 2010, y el a enfatiza riba e momento cu e refineria tabata cera, despues cu a surgi un clima sumamente negativo, unda cu na dado momento hasta e prome minister anterior a bisa sr. Klasse, e doño di Valero, pa pone e refineria tras di su lomba y bay cune.

Gobierno anterior a pone un BBO riba e empresa y despues cu e caso a bin dilanti na 2009 e refineria a cera.

E dignatario a reitera cu ora cu gobierno di AVP a drenta, na diferente ocasion a apela na e refineria pa mantene empleadonan den servicio mientras cu gobierno ta busca un solucion, y na cierto momento nan a invita Valero pa bin Aruba y pidi nan pa pone tur e disputanan cu nan tabata tin cu gobierno anterior riba mesa, y a sinta negocia cu nan, di manera cu na Januari di aña 2010 nan a logra e MOU cu nan y a firma un Settlement Agreement na April 2010, y na Juni a kita tur e leynan, entre otro e BBO y a laga Valero paga e placa cu nan tabata tin pa paga Pais Aruba ainda, y a crea un clima positivo cu na Juni 2010 Valero a dicidi di bolbe habri y a inverti mas di cien miyon dollar pa na Januari 2011 e reapertura tuma lugar.

Premier Eman a subraya cu e refineria a draai un aña completo y cu nan tabata mustra speranza cu cosnan por cambia riba e mercado internacional, pero ta danki na e empeño aki tabata tin tres aña mas di actividad unda cu tabata tin empleadonan trahando y a haya entrada cu cual por a evita loke e gobierno anterior a laga pa Aruba.

Awor cu Valero a bisa gobierno cu pa motibo cu nan tin perdida nan no por sigui, gobierno a haci hopi esfuerzo cu Petrobras, Ecopetrol, PDVSA, y a yega asina leu di atrobe manda señalnan pa Petrochina.

Petrochina a bin Aruba, nan a firma un MOU, nan a haci un oferta na Valero pa por yega na un acuerdo cu nan, unda cu Valero a acepta e acuerdo preliminar y despues di esey a sigui cu negociacionnan.

Locual gobierno di Aruba, Prome Minister ta splica, den su contactonan cu Petrochina, ta cu e compania aki ta sali for di e pensamento, cu e crudo cu nan ta cumpra di Venezuela, cu na e momentonan aki ta bay Asia, nan lo por a refina parti di dje na Aruba locual lo a haci e compania factible, pasobra e crudo aki probablemente nan lo haye na un prijs special.

Ora cu PDVSA a bisa Petrochina cu si nan refina e crudo cu nan ta bende cune na un prijs preferencial den su mesun area, e ta competi cu PDVSA contra e productonan final di nan mes refineria, loke e mandatario ta haya cu den cierto sentido tin cierto logica.

Asina e dignatario a duna di conoce. El a agrega cu e influencia di gobierno riba con ta bay sigui cu e relacion entre PDVSA y Petrochina, no ta mucho grandi. Pero si ta asina cu e canalnan cu tanto Petrochina como cu PDVSA ta habri ainda, y gobierno di Aruba ta sigui cu su empeño.

Prome Minister Eman ta hopi preocupa cu e actitud cu cierto miembronan di Parlamento ta tumando, hasta cu palabranan ofensivo contra un empresa cu pa tres aña largo a mantene un operacion na Aruba cu no tabata factible mas, cu a keda paga empleadonan pa mas cu dos aña sin cu tin operacion, salarionan cu ta core den mas cu diez miyon Florin pa luna, y cu e mesun actitud nan a core cu KLM, American Airlines, Carnival Cruises y Valero mes.

E dignatario a subraya cu e mesun tono ofensivo aki, e mesun actitud a pone Aruba den conflicto cu Reino Hulandes pero nada di e mensahe di dia 29 di September cu a bay pa e gobierno anterior, no a cambia.

Nan a keda mesun ofensivo, cu falta di profesionalismo y di etica, moralidad pa atende cu e situacionnan aki cu e seriedad cu e ta rekeri.

E dignatario a expresa cu e mesun tono cu el caba di scucha un rato prome for di e parlamentarionan Briesen y Siomara Ruiz, no yega na Valero te San Antonio, unda cu semper nan tin Aruba cu cierto aprecio pa locual nos pais y e trahadornan a produci den e refineria.

Prome Minister a remarca cu si e tono aki por yega na San Antonio, cualkier oportunidad pa chikito cu e por ta, e no ta yuda si nos pais mester di e beneficio di duda y tampoco pa e empleadonan e tono aki no ta un contribucion, pasobra mester di Valero y pa mustra e mehor boluntad pa yega na e mehor areglo posible.

E tono aki ta di un politiqueria na un nivel hopi abao, cual nos pueblo a rechaza caba na aña 2009, pasobra pueblo a mira tambe cu ora cambia e tono aki y hiba politica na nivel halto, Carnival Cruises, KLM a bolbe Aruba, y hasta un Valero cu a perde placa a revalua y a re-start e refineria. E dignatario a conclui bisando cu ta bon tog pa pueblo ta confirma un bez mas kico tabata e motibo cu a rechaza e gobernacion anterior, y pakico Aruba a sufri tanto daño durante e periodo ey, y cu nada di esey a cambia!

- Advertisement -

DUNA COMENTARIO

Please enter your comment!
Please enter your name here