Rutte alivia con Aruba ta atende cu trahadonan di Valero

Publication: Thursday, 20 September 2012. Categoria: General

ORANJESTAD/DEN HAAG:  E reunion cu Prome Minister Eman tabatin cu e Prome Mandatario Hulandes Mark Rutte no por a bay sin toca e tema di Valero.

    E mandatario Hulandes tabata interesa pa sa cual ta e situacion y kico Aruba ta haciendo. Segun Premier Eman a declara despues di e encuentro cu Rutte,  a splica di e esfuerso nacional cu ta haciendo pa acomoda e casi 500 trahadonan cu lo bin liber den e mercado laboral.

    Loke e tabata di acuerdo cune ta e polder model cu Aruba a introduci cu ta funcionando bon riba e isla. Esaki ta algo cu nan kier re-introduci na Hulanda pa cual e diferente gremionan ta den deliberacion riba esaki. E modelo aki ta algo cu a worde crea den pasado door di Hulanda mes. E ta un forma di dialogo cu ta crea e base solido pa decisionnan importante.

    E politico a bisa cu Hulanda ta pone su mes disponibel pa yuda Aruba den e reto grandi. Premier Eman a bisa cu el a sigura e mandatario cu Aruba lo sali di e reto aki y solamente ta desea pa Hulanda reforsa e acuerdo di cooperacion y logra pa algun organizacion of institutonan Hulandes establece na Aruba ya caba ta un gran ayudo. Esaki lo consolida e economia di Aruba.

    Hulanda y tur rond di mundo ta mira cu con e poder di compra a bay perdi y ta afecta hopi ciudadano. Na Aruba a sintie tambe, pa cual pa e grupo ma vulnerabel a duna reparatie-toeslag, aumento di bijstand, kinderschool toeslag, pues dunando hopi atencion na e situacion social.

     ”Tin hopi pa haci ainda, pasobra tin un retraso hopi hopi grandi, pero cu e economia creciente, cu participacion internacional, nos ta haya cada bes un tiki mas espacio pa yuda esnan mas vulnerabel den comunidad y yuda nan sali padilanti,” Eman a comenta.

    El a agrega cu e tipo di pensamento aki tambe ta hayando hopi apoyo na Hulanda y elogio pa loke Aruba ta haciendo.

     “Mi ta sintimi bon ora cu un Premier di Hulanda ta mustra riba e forma con Aruba ta resaltando pa su forma constructivo di busca cooperacion den Reino,” Eman a indica. 

    El a finalisa bisando cu Aruba a demostra kico e por haci y logra na bienestar di su pueblo, y ta worde demostra con expresionnan di Hulanda ta yega riba e forma di pensa di Aruba cu ta marca tin biaha e caminda cu mester cana pa un relacion nobo den Reino. Gobierno ta kere den e forma di dialoga, combersacion, pa por saca e miho conclusion di diferente pensamentonan.

Leave a Reply