Si oposicion kier drenta Bushiri e mes lo habri porta pa nan
Minister Otmar Oduber:
Pasobra ta nan a crea e ruina cu tin eynan awor
ORANJESTAD (AAN): Diaranson atardi Minister Otmar Oduber riba peticion di prensa a duna un reaccion riba e declaracionnan sin base di parti partido MEP cu a dicidi di yama un conferencia di prensa na Bushiri Hotel, cu ta un di e ruinanan laga atras precisamente pa Gobierno di MEP.
Segun un miembro di prensa, guardianan di seguridad kier a sacanan for di e tereno y lo a bisa cu mester puntra Minister Oduber e pakico di esaki y a haci e pregunta aki na e mandatario.
Minister Otmar Oduber a bisa cu esaki ta un sorpresa pe, pasobra na ningun momento Gobierno a worde notifica cu tin hende cu ta bay bishita Hotel Bushiri. “Mi no tabatey dus mi no lo por bisa cu esey tabata e palabranan di cuerpo di seguridad, mi lo mester puntra esey. Loke si mi por bisa ta cu Gobierno tin un opdracht duna na nan cu ningun hende no por subi e tereno, incluyendo hendenan di Gobierno mes”.
El a bisa cu e edificio ta un ruina y tin su peligernan y tambe cosnan cu por worde saca y no mag di worde saca. E cuerpo di seguridad cu tin eynan a worde poni door di Sr. Eddie Briesen, e no a worde cambia, y ta eynan pa 6 aña caba y costando hopi placa. Loke Minister Oduber si a haci ta baha e costonan cu e seguridad aki ta encera te na mitad. Anteriormente tabata paga 340 mil Florin pa aña y a logra reduci e suma aki te na mitad.
Continuando, Minister Oduber a splica cu na momento cu un hende kier haci uso di e propiedad aki, manera ta e caso di training di militarnan y expedicion di schoolnan cu ta pidi pa haci cierto cosnan eynan, tur ta bay Conseho di ministronan pa haya aprobacion. E aprobacion aki ta worde manda pa e compania di seguridad pa nan sa e ora cu tin permiso di Gobierno.
Minister Otmar Oduber a expresa igualmente cu si oposicion ta interesa pa drenta eynan, e mes lo bay habri porta, hala cabuya pa nan pasa, pasobra nan ta a crea e ruina cu tin eynan awor.
