Victima asesina a casa na Juni y tabata traha na Marriott Hotel

Publication: Wednesday, 26 September 2012. Categoria: Policial

ORANJESTAD    (AAN):   Bao yoramento e mama di e victima Esperanza Amparo Marte a conta con e dia anterior anochi su yiu tabata cerca dje. Nan a mira novela hunto.

    Un yamada a drenta y e mama a haya straño cu su yiu a papia di pasaporte y bisa tambe cu ainda e no a haya esaki. E mama ta sinti cu e yamada aki mester worde investiga.

    Segun e mama esun cu a mata su yiu conoce e cas pasobra di pafor a lock e porta unda e yiu di 12 aña tabata drumi. Mainta a habri diamars algo pasa di 6or y ora e criatura a lanta pa bay school e mama no tabata tey. Su welo cu tabata biba masha cerca a busca e nieta y asina a hibe pa coy bus cu ta hibe school.

    Nan no a mira mancha di sanger den e cas. Asina mes e caso a sosode caba e momento ey pasobra e victima no tabata den e cas pero a ser agredi den su cas prome cu el a ser benta den mondi.

    Fiscal Jaap Zondervan a splica cu ta importante pa tene e curpa na e sitio ora di investigacion. Na Hulanda por tene un curpa te hasta mas cu un dia. E clima ta coopera pero na Aruba mester haci mas liher.

    A base di pruebanan cu mester acumula entre otro di e asesino na curpa di su victima ta importante pa haci tipo di investigacionnan asina. Ainda no por papia di un sospechoso conoci aunke rumornan tabata fuerte cu tin bista riba un hende.

    E victima tin tres yiu di cual dos ta adulto y esun di 12 aña cu ta biba cu e mama den e trailer. Tabata intencion di haci preparacion pa e casa bin Aruba mirando cu el a casa na Juni.

   Tabata tin intencion tambe di amplia e trailer pa traha un camber pa e yiu di 12 aña pa e tin su privacidad. Awor e no tey mas pero e mama di e victima ta bisa cu e castigo lo bin di halto pa esun cu a mata su yiu. Nan mes no ta bay tuma represaya den e caso aki of ley den nan man.

    E castigo e asesino lo haye for di esun cu tin e poder pa esaki. Hopi conocir di e famia a bin na e sitio y tabata manda palabranan di forza na e famianan. Coleganan na Marriott sigur lo a keda sacudi cu nan colega den house keeping a fayece di e forma aki. Te hasta Esperanza Amparo Marte tabata den e proceso pa bay over na waiter den mesun Marriott.

 

One Response to 'Victima asesina a casa na Juni y tabata traha na Marriott Hotel'

  1. September 26, 2012 at 9:12 pm
    juana solano

Leave a Reply