Victima mes ta resulta di ta e atracador!
ORANJESTAD (AAN): Dialuna anochi a sosode un caso di atraco na e oficina di catochi “Suerte di bo cu mi” situa den Wilhelminastraat. Sinembargo recherchenan di Atraco Team a detene e mesun empleada, supuesto victima di e atraco, esta e señora E. Winterdaal di 48 aña di edad.
Ta sospecha cu el a gaña cu nan a atrak’e y cu ta e mes a coy e placa di benta y a gast’e caba.
Recherchenan a interoga e señora pa un rato anochi ainda na Warda di Polis Oranjestad, pa despues encarcel’e na Warda di Polis Santa Cruz. Polis a confront’e cu algun prueba, den cual ta sospecha cu na ningun momento ningun atracado a drenta e luga ni cu a sali cu tur e placa di benta.
Un di e pruebanan vital ta e camara di seguridad di un otro negoshi den vecindario, cu cual por mira claramente cu ningun hende a drenta e oficina di number.
Ta sospecha cu e bendedor di number mes a pasa man pa mas of menos 1500 Florin cu tabata tin den e caha. Pero pa tapa su ladronicia, el a core yama Polis bisando cu nan a atrak’e. Ta acusa e sospechoso awor di ladronicia y di entrega denuncia falso na Polis.
