Home General “E secreto di yega 103 aña ta secreto di Dios”

“E secreto di yega 103 aña ta secreto di Dios”

2
1
SHARE
- Advertisement -

Sra Maria Anette Maduro Lampe semper gusta hari

ORANJESTAD   (AAN): Maria Anette Maduro Lampe tin 103 aña y ta di bario di Mahuma.

Durante un entrevista relaciona cu Dia di nos grandinan, señora Lampe a bisa cu el a haya 15 yiu cu su casa Mauricio Maduro.

Ora e tabata mucha e tabata gusta hunga entre otro cu popchi.

Pa loke ta cuminda, e tabata gusta come bonchi, komkommer y carni.

Señora Maduro Lampe nunca a traha, pero na cas tabata tin suficiente trabao cu e 15 yiunan cu orguyosamente el a cria.

DIARIO a puntra señora Maduro di e bistimento di e temponan ey y el a bisa cu muhernan tabata bisti shimis si y no carson.

Pa loke ta amigonan di school, sra Maduro a bisa cu tur a muri caba.

Awor ta su famia y bisiñanan ta su amigonan.

DIARIO a puntra Señora Maduro con el a conoce su casa y el a bisa cu ta na misa el a conoce.

Pa loke ta e enamoramento di antes, sra Maduro a bisa cu e persona tabata bin 1 of 2 biaha pa siman pa bishita e persona cu e tabata enamora di dje.

E famia di sra Maduro tabata cria bestia e tempo ey, incluyendo cabrito, porco y galiña.

Noticia di morto bo no tabata haya den corant manera awor, sino for di leu bo tabata tende un tiro di cañon cu tabata indica cu un hende a fayece.

DIARIO a puntra sra Maduro cua tabata e temporada mas dushi di su hubentud  y el a bisa cu tabata dushi ora e tabata conoce amiga y nan tabata bin cerca dje.

DIARIO a puntra e señora tambe con e ta sinti awor cu e tin 103 aña y el cu un sonrisa grandi riba su cara el a bisa cu te awor e ta sinti su mes bon.

El a bisa cu e tin pasenshi y e ta pidi Dios pa dune poco bida mas.

DIARIO a puntra señora Maduro kico ta e secreto di por a yega 103 aña.

“Esey ta secreto di Dios y no dimi”, segun señora Maduro.

El a bisa tambe cu e tempo ey nan tabata come hopi pisca y carni fresco, tambe bonchi patia etc. y esey quizas a yuda tambe.

- Advertisement -

1 COMMENT

  1. Super proud di Tanta Netchi … E TA e role model di nos tur den famia ….. Cu nos bon Dios dune HOPI mas anja di bida yena cu Salud, Paz y Felicidad y claro rondona di su bunita famia!!!

DUNA COMENTARIO

Please enter your comment!
Please enter your name here