Tocante cambionan den Petroleum Verordening:
ORANJESTAD (AAN) – Matutino DIARIO a entrevista señor Armando Curet, director di e Compania Arubano di Petroleo (CAP), despues di un reunion cu el a tene cu e Comision Permanente di Staten cu ta atende cu asuntonan di energia.
E reunion tabata tin di haber cu leynan mester wordo trata pa e proceso di explotacion di petroleo den nos awanan teritorial.
E funcionario a acerca e comision pa informe riba e background di leynan cu mester bay trata pronto, den e contexto di Petroleum Verordening Aruba, cu su aña di nacemento ta 1987 y cu desde e fecha aki tabata tin hopi desaroyo constitucional di Antiyas Hulandes.
Pero Antiyas Hulandes no ta existi mas for di 10 October 2010, y den e ley aki ta referi na un relacion entre Aruba y Antiyas Hulandes y esaki ta aspectonan cu mester a wordo actualiza den dicho ley.
Señor Curet a agrega, cu banda di esey, tabata tin cambionan den e leynan cu ta regarda belasting. Tin diferente cambio cu a tuma lugar den e leynan di belasting, y cu no a wordo hinca den e Petroleum Verordening.
Esaki ta debi cu for di e campaña di exploracion cu tabata tin na aña 1990, despues cu a bora pa test, no tabata tin mas actividad y señor Curet ta kere cu pesey e cambionan den belasting cu a wordo introduci despues, no a wordo incorpora den e ley di petroleo, cual tin un articulo unda cu diferente asunto di impuesto a wordo regla den dje.
Señor Curet a menciona cu e meta principal pa cual el a bay reuni cu e comision ta cu den pasado CAP a yega di señala cu tin necesidad di actualiza e ley, y mientras tanto Directie Wetgeving y Juridische Zaken a traha riba esey y tin un proposicion riba cambio di e ley, y el a mustra e comision ta pa duna background na e necesidad pa haci e cambio di ley.
Importante den esaki ta, sr. Curet a subraya, ta cu entre 1989 y 1990 te cu awor, tin desaroyonan tecnologico y economico cu a haci posible no solamente explora pero tambe produci petroleo den hopi mas profundidad den lama y esaki ta e actividad cu CAP kier promove.
Akinan ta na unda e leynan existente tin algun drem, specialmente den e aspectonan di belasting y mester haci algun di e adaptacionnan ey den e ley existente.
