Home General DOW bezig cu proyecto di total 5 kilometer di linea blou riba...

DOW bezig cu proyecto di total 5 kilometer di linea blou riba caminda pa core bicicleta!

1
0
SHARE
- Advertisement -

Ing. Jossy Figaroa director DOW ta splica:

ORANJESTAD (AAN) – Matutino DIARIO a entrevista Ing. Jossy Figaroa, director di Departamento di Obranan Publico (DOW), relaciona cu e linea blou cu ta worde traha den area di hotel.

Ing. Figaroa a splica cu esaki ta indica cu esey ta un caminda pa core bicicleta. Manera ta conoci Gobierno y Parlamento e ultimo añanan ta poniendo hopi enfasis riba e manera aki pa haci deporte, y awendia por mira cu hopi mas hende ta core bicicleta riba caminda, tanto “mountain bays” como “road bays”, cu ta algo bunita pa mira.

Durante e ultimo tratamento di presupuesto pa infrastructura den Staten, parlamento a trece hopi dilanti cu gobierno mester pone hopi mas atencion riba loke ta nos camindanan na Aruba, pasobra e automobilistanan no ta pone hopi atencion riba hendenan cu ta core bicicleta riba caya.

Ing. Jossy Figaroa tambe ta nota esaki pasobra e mes tin biaha ta core bicicleta y e ta nota cu ta un poco peligroso. Pesey den Parlamento nan a bin cu un mocion pa bisa gobierno pa bay traha mas caminda pa core bicicleta.

Pesey un par di luna pasa a sinta pensa na unda ta mehor pa bin cu e proyecto y a dicidi cuminza for di Westin bay te banda paden di Juancho Yrausquin Boulevard te na Fatun tur dos banda di caminda.

E ta bin un linea blou di 1.05 meter y banda di dje un linea blanco di cinco centimeter cu den total ta 1.2 meter pa ambos banda di caminda.

Ing. Figaroa a agrega cu for di Quiz Us te na Super Food, ta bay tin un pida solamente panoord di e caminda, unda cu e trafico ta di un direccion y cu e bicicletanan tambe por bin di ariba bay abao. Esaki ta bin na un banda di caminda.

Director di DOW a indica tambe cu e area cu nan a kibra hopi cabes riba dje ta esun cu ta bin di Amsterdam Manor te Costa Linda e parti pabao.

El a subraya cu algun aña pasa DOW a drecha e pida di asfalt banda di caminda pariba y pabao nan a lague manera e tabata pasobra nan tin un proyecto di basta mas aña, cu ta esun di Linear Park. Awor nan ta bezig cu e prome fase y pronto ta cuminza cu e di dos etapa y ta sigui te e ultimo fase cu lo yega te na Arashi.

Figaroa a señala cu Linear Park ta bay haci un diferencia pa locual tin na Eagle y pesey DOW a keda warda, pero manera ta mustra aworaki no ta sino te aki dos pa tres aña ta bay tin un cambio di trafico eybanda. Pesey, nan a bisa cu ta mehor pa pone asfalt maske sea un tiki mas fini, pero cu ta mustra hopi mehor cu lague manera e ta awor.

Ing. Jossy Figaroa a comenta cu tur hende cu ta haci uso di e caminda aki na Eagle parti pabao, ta puntra con por ta cu den un area unda cu no solamente hopi di nos Arubianonan pero nos turistanan tambe ta core, ta den asina un mal condicion.

Pesey den e siman aki ta bay nota cu den oranan di anochi, DOW ta trahando riba dje. Otro siman e ta cla y tambe e ta bay haya su linea blou unda cu por core bicicleta. Un total di mas cu 5 kilometer di caminda pa core bicicleta ta bay worde traha aworaki, unda cu DOW a busca tres compania pa duna prijs pasobra esaki tambe ta un sorto di proyecto piloto pa bay wak con e ta y kico e ta, y e compania cu a duna e mehor prijs tin e trabaonan aworaki.

E contratista a indica cu e por hacie den dos siman basta e por haya e caminda liber, y esaki ta e caso, Jossy Figaroa a menciona. El a agrega cu e parti di Amsterdam Manor lo ta cla pa diadomingo anto e compania por cuminza haci su trabao eynan tambe.

- Advertisement -

DUNA COMENTARIO

Please enter your comment!
Please enter your name here