Un opinion tur hende por tin, sea cu e ta pas cu e coriente di pensamento general, o ta ser lanza como un carnada pa provoca un discusion mas a fondo. Pero, no ta conoci, o por lo menos no ta e custumbra cu den e mesun partido, y e mesun fraccion den Parlamento, ta surgi opinionnan totalmente contrario riba e mesun topico. Asina nos ta haya e ultimo hazaña di Juan David, kende no ta cansa di hiba e contrario cu su mesun coleganan, y ta hacie, mi ta supone, pa yama atencion riba su mes y bati riba su pecho manera un gorila pa anuncia su presencia (por ta pa hendenan no lubida cu e tey!).
E cuestion di asbesto haya supuestamente na un school, ta algo serio, cu merece un investigacion exhaustivo pa determina si di berdad e school tin asbesto o si e alumno cu a presenta cu un o mas piedra cu ta contene rastronan di asbesto, a ser haya propiamente na e school en cuestion.
E no ta un materia cu ta permiti discusionnan politico, sino un investigacion profundo di parti di profesionalnan cu por determina si tin o no e presencia di asebesto na e school. Pasobra si resulta cu e ta berdad, y cu e piedranan a ser haya riba e tereno di e school, anto pasonan drastico y inmediato mester ser tuma pa protege e muchanan cu ta studia eynan. Asbesto ta un producto hopi peligroso, cu ta acumula den e pulmonnan di esnan cu ta aspire, y por termina den un enfermedad serio manera cancer.
Mi intencion di skirbi e editorial aki no ta pa participa den e discussion cu Juan David a provoca, sino pa respalda Chris Dammers completamente pa e manera cu el a trece e topico padilanti y no a haci nada otro cu pidi un investigacion serio prome cu core bati alarma cu por resulta falso. Pa loke ta trata Juan David, mi no sa cua su mision ta den politica, y mucho menos den Parlamento, y menos ainda como parti di un fraccion den cual e no ta parce di sintie mucho comodo. Alomenos esey ta e impresion cu e ta duna, y su record di atakenan contra su propio coleganan y Ministronan ta evidencia suficiente pa pone hende pensa cu e no ta sintie trankilo cu nan. E smushi cu e kier mustra su independencia di pensamento, of e nonsense cu el a drenta politica pa cuestiona tur hende ora cu e no ta di acuerdo cu nan, mi ta haya hasta ridiculo. Ora bo drenta politica, y bo afilia na un partido ta pasobra bo ta kere den su ideologia y ta dispuesto di mustre lealtad y obediencia. Esaki no tin nada di haber cu independencia di pensamento; e ta parti di e mundo politico manera nos conoce y cu a bin ta funciona asina for di tempo cu partidonan politico a ser funda riba nos isla.
Mi no sa kico Mike, como lider di Gobierno y di AVP, ta pensa, pero mi ta haya cu na momento cu un di su hendenan vota, por ehemplo, contra un mocion di su mesun fraccion, el a demostra di no kier ta parti mas di e partido. Y ora cu e continua cu e fachada di cuestiona e Ministronan (Otmar y Arthur, por ehemplo) y awor e Parlamentarionan (Lainda y Dammers), e ta dunando di conoce claramente cu e no ta conforme cu e postura cu su Partido (y su Gobierno) ta tuma riba diferente issue. Bo no ta huzga un politico riba un solo incidencia, sino riba e modelo y tendencia di su arankenan individualista. Juan David por tin (y di mi parti keda) cu su opinionnan, y su afan di demostra cu e ta completamente independiente di tur hende, tur partido y tur Gobierno, pero mi ta haya cu den e partido cu e ta milita actualmente, mester tin un termometer cu ta midi loke por y no por, y e boluntad politico pa splike e diferencia entre nan dos. Si esey no sosode, por spera mas y mas di su atakenan contra su propio coleganan den Parlamento, y alavez su Ministronan.
Mi no ta mira ningun problema pa un Parlamentario tin su propio opinion, y exprese ora cu e ta haya ta bon. Pero, ora e use constantemente contra su propio coleganan y Ministronan, mi ta haya cu e ta indicativo di un descontento profundo cu e lineananan general cu e partido a establece pa guia Aruba for di Gobierno. Juan David ta, sin duda, un persona inteligente, y pesey mes e no por tira e culpa di su rebeldia riba un ignorancia (cu e no tin) tocante con un partido ta funciona y ki lealtad e ta exigi di su componentenan.
