Parlamentario mr. Andin Bikker:
ORANJESTAD (AAN) – Durante e conferencia di prensa di fraccion di Partido Democracia Real, su lider politico mr. Andin Bikker a bolbe referi na e maneho di Minister di Husticia, y el a reitera cu e minister aki no ta capacita pa e cargo cu e ta ocupa.
Parlamentario mr. Bikker a subraya cu practicamente tur departamento cu ta cay bao di e minister aki tin problema cune y casi tur ora por tende cu un of otro a para trabao.
Luna pasa tabata Imigracion, na KIA tambe nan a protesta, y ultimamente ta Brandweer cu a pone nan trabao abao.
E no ta mira esaki sosode bao otro ministerionan cu cada rato e departamentonan ta “walk out” of tin protesta di e magnitud aki.
Parlamentario mr. Bikker a señala cu na su opinion e minister aki tin problema con pa anda y comunica cu e personal bao di su mandato, y e ta kere cu mester atende cu esaki. E ta ripara cu hopi biaha ta asuntonan di promocion di empleadonan, y hasta evaluacionnan haci pa e gobierno aki mes ta mustra cu si un persona no tin un suma di entre dos mil pa tres mil Florin mensual na man, e no por sobrevivi den nos economia, y tin hopi ambtenaar cu nan promocion ta pega pa hopi tempo caba y ta hibando masha poco placa cas, y cu nan razon nan ta protesta pa nan posicion huridico, pasobra LMA ta stipula cu cada tanto tempo nan tin derecho riba nan evaluacion, y pa esaki nan ta haya promocion.
El a subraya cu tin hopi di e personanan aki cu ta traha oranan largo, pero nan ta mira aña aden, aña afo cu nan ta haya mesun salario y pa colmo e gobierno aki a bay campaña bisando cu nan ta bay percura pa nan posicion huridico worde regla.
Pero constantemente por mira cu e minister aki no ta atende cu e asuntonan aki na un manera debido, e ta papia bunita pero ta keda alarga e asunto y despues e personanan cu ta traha den e departamentonan concerni ta fada, bay over na accion y e accionnan aki ta acumula y ta expone nos pais na diferente situacion cu por worde evita.
El a subraya cu nos ta bayendo tres aña di gobernacion caba y e mester atende esaki na un manera serio pasobra ya nos ta den aña cuater di Aña Parlamentario, y constantemente su ministerio ta pata pata di problema.
