Home General Minister Michelle Winklaar a anuncia cu e di dos rond di “vooropleiding”...

Minister Michelle Winklaar a anuncia cu e di dos rond di “vooropleiding” na Gerrit Rietveld Academie

0
0
SHARE
- Advertisement -

Desaroya bo talentonan artistico na nivel di H.B.O.

ORANJESTAD   (AAN): Gerrit Rietveld Academie di Amsterdam, Hulanda ta un di e academianan di arte mas prestigioso na mundo y for di aña pasa Rietveld a start cu un programa di “vooropleiding” cual ta worde duna na Aruba.

Esaki ta un preparacion excelente pa cualkier hoben cu ta desea di prepara pa un estudio di arte na nivel di HBO.

    Rietveld Academie, hunto cu Ministerio di Cultura, ta ofrece e curso presentando un confrontacion cu e mundo di arte internacional na nos hobennan cu talento, deseo y ambicion pa studia arte.

    E curso preparatorio na Aruba ta un introduccion na e forma cu cosnan ta funciona na academianan di arte internacionalmente y un preparacion pa un posibel futuro aplicacion y admision na Gerrit Rietveld Academie. Trahando cu maestronan di profesional di nan academia di Hulanda, Rietveld Academie ta ofrece e curso na un tarifa rasonabel pa nos hobennan Arubiano, pero tambe ta invita inscripcionnan di studiantenan di otro paisnan na un tarifa special.

     Den su prome aña, cual a conclui recientemente, 18 studiante a participa na e programa di 30 siman, Minister Michelle Hooyboer-Winklaar di Asuntonan Economico, Asuntonan Social y Cultura a bisa. Ta falta solamente algun siman pa e proximo curso di 30 siman cuminsa y e mandatario ta encurasha tur hoben interesa pa tuma contacto cu e team encarga cu Rietveld Academie na Directie Cultuur, telefon 5822185.
    “E prome aña tabata sumamente exitoso”, asina Minister Hooyboer-Winklaar a comenta. El a añadi cu pa drenta Rietveld Academie na Amsterdam e competencia ta hopi fuerte, cu miles di aplicante, pero cu tin solamente dos shen cupo disponibel. Pa medio di e colaboracion di Aruba cu e academia prestigioso aki, e porta ta worde habri y ta bira mas facil pa nos hobennan pasa e seleccion y admision.

    E “vooropleiding” ta ofrece e studiante un bentaha grandi, Minister Hooyboer-Winklaar a comenta. Un total di 15 studiantenan di e 18 nan cu a completa e prome curso preparatorio na Aruba a dicidi pa drenta Rietveld na Hulanda y a experencia un entrada mas facil na e estudio riba nivel di HBO aki.

    E bentaha grandi pa e alumno local ta cu e curso di calidad halto ta worde duna na Aruba mes. E ta combina diferente tecnica, e ta hopi varia y pa medio di e tareanan bon presenta ta stimula e uzo di tur cinco sentido, retando e studiante pa produci piesanan y expresionnan unico. Un di e ex alumnonan mas famoso cu a gradua di Rietveld tabata di Aruba mes, esta e diseñador mundialmente reconoci: Percy Irausquin.
    Tres “module”, como tambe teoria ta worde presenta durante e 30 simannan di e curso preparatorio. E prome module tin como tema e “Curpa Humano”, e di dos ta concentra riba “Bida Cotidiano” y e di tres ta titula “Resto di Mundo”. Cada module ta worde cera cu un of otro actividad unda e studiantenan ta presenta nan trabao.

    Minister Michelle Hooyboer-Winklaar ta invita tur hoben interesa pa explora su posibilidad nan y oportunidadnan pa loke ta trata arte como un profesion, pa no duda y tuma contacto cu Directie Cultuur pa informacion y registracion.

    Ta admiti studiantenan cu un diploma di HAVO of un diploma di MBO, of ekivalente. Mas informacion ta disponibel via di www.gerritrietveldacademie.nl/en/preparatory-course-aruba. Pa haya un bista riba kico mundo ta pensa di Gerrit Rietveld Acadamie, esaki ta algun webpages dedica na esaki:

http://www.itsnicethat.com/articles/louisa-gagliardi

http://mariagroot.com/2010/10/15/theres-nothing-dutch-about-dutch-art-academy-rietveld

http://en.wikipedia.org/wiki/Gerrit_Rietveld_Academie>

- Advertisement -

DUNA COMENTARIO

Please enter your comment!
Please enter your name here