Den caso di negligencia di pacient :
ORANJESTAD (AAN) – Redaccion di DIARIO a ser bishita pa un pacient cu ta pasando den situacion hopi tristo di salud, ta trata aki di un pensionado y el a ser conseho pa entrega keho na e departamento concerni di loke a sosode cune.
E dama di nos comunidad ta spera cu tur hende cu ta sinti nan mes neglisha y cu tin motibo pa reclama pa nan skirbi y manda nan carta di keho.
Carta di e dama ta ser publica awe y ta spera cu e departamento concerni tuma contact cune pa asina e splica den tur detaye loke a sosode cune.
Departamento di Keho
Horacio Oduber Hospital
Oranjestad
Respetable Srs.
Pa medio di e carta aki ami, ta dirigi mi mes na e departamento aki pa entrega keho contra loke ami ta considera un falta di atencion di algun dokter cu a laga mi handicap awe.
Seis siman mi a keda cu mi brasa den gibs drumi na mi cas cu hopi dolor, bayendo diferente dokter. Pa dos aña mi persona a ser neglisha pa loke ta trato y atencion medico di tal forma cu e nervionan di mi brasa drechi ta morto awe y mi brasa ta colga na banda.
Mi a ser dirigi na e departamento aki pa entrega keho y a dicidi haci esaki pa asina, e departamento atende cu e dokternan aki y ningun persona keda perhudica pa nan negligencia.
Mi tin fecha, carta y detayenan cu por para tras di loke mi ta referi aki cu mi ta yen di dolor, mi brasa ta manera kima y segun dokter nada mas por ser haci, pasobra tur e nervionan ta morto.
Esaki ta keho cu e pacient a trece na redaccion di DIARIO y ta cuanto biaha caba cu DIARIO a yega publica casonan di negligencia medico, pero parce nada ta ser haci, pa evita e erornan aki.
Envez cu e situacion aki sea di negligencia of loke sea drecha masha poco cambio ta ser mira den e direccion aki ya cu continuamente algo ta sosode cu ta mustra cu te ainda negligencia ta sigui. Recien un caso increible a sosode cu a costa bida di un ser humano, pasobra un detaye importante no a ricibi e atencion necesario di esnan encarga y a ser lubida y cu consecuencia.
Ta cuanto di e detayenan chikito aki ta ser neglisha cu e consecuencia cu e ta costa bida di sernan humano, cu a bay en busca di ayudo ?
Lo ta bon pa sa tambe ki claridad tin den e cantidad di mortonan cu ta sosode na Aruba y si tin e acta di defuncion cu mester ser entrega na e famianan pa nan sa exactamente di kico nan sernan stima a muri y ken ta prepara e acta.
A bira tempo pa nos na Aruba cuminza habri wowo exigi derechonan di pacient y den caso cu morto cay averigua y sa ta di kico hende a muri, pasobra “morto natural” a para bira custumber.
Otro fenomeno cu tin andando na Aruba ta cu casi ningun hende ta duna keho por escrito na e departamento concerni. Miedo di represalia ?
Lo ta bon pa e departamento aki informa cuanto keho ta ser entrega y si kehonan ta ser atendi.
Keho ta bin, keho ta bay, pero den pasado tabata laga nan drumi den lachinan di oficina di Salubridad Publico y ta despues cu DIARIO tabata publica tantisimo caso di negligencia medico, hospital a rebiba su departamento di keho, pero parce como cu ta un hospital so tin riba e isla aki, mayoria pacient y nan famia tin nan boca sera, pasobra tin hende hasta tin miedo di entrega keho, pasobra no tin caminda pa bay !
Loke si tin na cantidad ta keho y mas keho y no solamente kehonan, pero mas hendenan cu ta muri a causa di negligencia di un of otro persona.
Hasta tin comentarionan y rumornan ta bisa cu hende a haya te hasta miedo di bay hospital aki, pasobra bo no sa kico nan por lubida, ki eror por ser haci den pura, ken no a presenta y si tin hende prepara y cla pa enfrenta casonan di emergencia ?
E otro problema cu nos mes a crea aki na Aruba ta e tantisimo hende cu tin aki riba nos isla, falta di mas dokter pa duna bon atencion na tur hende.
E sobrecarga, presion, e peso di responsabilidad y debernan pa cumpli bon pa loke ta medicina en general no ta suficiente pa atende tanto pacient.
Tur hende cu tin di haber cu atencion na pacientnan cuminzando for di e asistent di dokter di mas humilde te na e cirujano renombra ta hendenan di carni y weso ta cansa y ta sinti stress.
Pero, asina mes nan tin cu trata na mantene nan mes calmo atendiendo tantisimo pacient cu ta yega consultorio cu mil y un problema di salud y cu kier atencion y alivio lige, e mesun tension aki ta crea mas stress, descuido, y hasta negligencianan.
Esaki no ta excusa. Ken ta bay paga pa esaki ?
Ban spera pa ora un persona yega emergencia, e ser atendi manera e situacion di emergencia ta rekeri y cu urgencia, pa preserva bida di hende”, tabata varios keho compila y tambe di persona cu a laga DIARIO publica su carta entrega na e departamento di keho na hospital.
