ORANJESTAD(AAN): Gobierno no por bisa otro cu e reunion cu tabatin diabierna mainta cu directiva di sindicato SPA a bay den bon ambiente, cu discusionnan sano.
Durante e reunion aki, e mandatario a splica, a toca diferente punto cu SPA a bini cune y un decision na final ta cu lo keda reuni regularmente riba diferente tema cu ta regarda Cuerpo Policial.
Un di e principal preocupacion di e sindicato ta e Warda di Polis di Playa cu ta den un condicion basta malo, no solamente pa e biehez di e edificio, pero tur e cobamento rond di e warda ta haci e situacion un tiki dificil pa e Polisnan.
Riba dje cu e ta trece un “overlast” di stof. E mandatario a splica cu tramitenan ta worde haci pa saca e trahadonan for di e warda aki. Por ehempel, e parti di patruyahe di Oranjestad ya caba a worde muda pa Dakota, mientras cu ta trahando riba mudansa di e seccion di Recherche pa Eagle den Frankrijkstraat na ex AZV.
E no por a tuma luga mas lihe, ya cu ta haciendo e remodelacion di e edificio pa e ta apto pa e cuerpo di Recherche. Gobierno ta spera cu den algun siman Cuerpo Policial lo ta completamente for di e edificio.
Na momento cu esey sosode, lo cuminsa traha riba un plan di remodelacion completo cu mester keda cla den algun luna, pa e funcionarionan bolbe back den dje. E intencion ta pa centralisa e seccion di Recherche den e edificio aki, mientras cu lo traha un Warda di Polis nobo pa Playa.
Unda esaki lo bay ta, no a worde dicidi ainda. E hecho cu e funcionarionan ta ubica na Dakota, ta haci cu por sali basta lihe direccion di Playa.
Esaki ya caba ta un indicacion cu no necesariamente e warda nobo lo mester worde construi den centro sino e por ta un tiki afo, por ehempel na Playa Pabou. Pero, e mandatario a bisa, tur opcion ta keda habri.
Pa loke ta resto di discusion, el a bay riba temanan interno di e cuerpo cu gobierno a prefera di no bay riba nan. A papia di e aspecto di “overtime” caminda a worde splica na e sindicato cu mescos cu ta e caso na final di tur aña, ta yega na final di e presupuesto cu tin disponibel.
Tin biaha mester haci cierto adaptacion pa cierto postnan cu normalnan ta pasa over. Y tin postnan cu hopi biaha no por worde controla. Por ehempel carnaval y concierto ta haci cu mester uza mas ‘mankracht”. Esaki ta come den “overtime. Y ta costonan cu no por premira. El a sigura cu tur aña ta presupuesta overtime y ta worde paga. Pero tur aña e ta pasa over.
Otro pregunta ta riba landsbesluit di Polisnan. A informa cu no a logra pasa tur e landsbelstuit. A logra pasa 1300 pero falta hopi toch y Gobierno ta spera cu ta cla pronto cu nan.
