Home General COBA FOR DI “BAUL DI HUCONA” (8)

COBA FOR DI “BAUL DI HUCONA” (8)

5
0
SHARE
- Advertisement -

Na final di añanan 1970 y comienzo di 1980, Baul di HUCONA tabata e columna mas popular di corantnan cu tabata circula. A dicidi di bolbe cune den otro forma pa motibo cu hopi hende a lubida loke tabata tin den historia di Aruba , sigur ultimo 50 pa 80.

Otronan cu no a lubida no tabata sa di hopi cos cu a pasa y ta wordo corda cu e topiconan aki. Den e ultimo simannan, e columna aki a cay na agrado di masha hopi lector pasobra hopi a corda topiconan presenta y hopi a haya sa mas di nos Aruba. Cosnan cu nan no tabata sa.

 

 

CRIMEN Y DELITONAN

 

Varios hende a puntra mi, si di e periodonan cu mi ta skirbiendo ultimo tempo tabata tin crimennan, ladronicianan y otro delitonan cometi na Aruba. Mi contesta tabata cu crimennan , esta homicidio of asesinato, ladronicia, maltrato tabata mescos cu awendia, cu diferencia cu nan tin cu wordo mira mas bien cu otro wowo, esta di tempo antiguo y no cu wowo di modernismo di awe. Den e otro columna lo mi bin riba algun di nan.  Awe lo dedica riba algun personahe, malesanan y docternan

DIFTERIA, TIFUS, MALARIA, DISENTERIA

Dia 29 di december 1886, Gouvernements Geneeskundige, cu nos por considera awe cu tabata docter,  a informa di tin 7 mucha cu ta sufri di diphteritis (difteria) pero no di mal caracter.

Un luna despues, dia 28 di januari 1887, Gouvernements geneeskundige a pone gezaghebber na altura cu den distrito di Noord, tin varios caso di “moeraskoorts”, algun di nan parce tifus. Ta un mucha so a muri te awor, y e otronan ta den condicion preocupante.

E causa tabata e tera muha debi na awacero pisa di comienzo di luna.

Tres dia despues gezaghebber a ser poni na altura cu a haya dos caso mas di moeraskoorts ( malariakoorts) den di dos distrito (Noord) . E otronan ta recuperando . For di principio te fin di januari a yobe casi tur dia.

Dia 26 di februari a bolbe ricibi rapport di Gouvernementsgeneeskundige  di 20 caso nobo di moeraskoorts na Noord. Hopi ta grave, 1 a muri.

Gouvernements geneeskundige a informa gezaghebber dia 27 di december 1887 cu el a haya un mucha pa trata cu ta sufri di diphteritis y di e tipo malo. E mester a laga isola e mucha.

A dura 6 luna, te dia 12 di juni 1889 cu por a lesa atrobe di malesanan y ta un “sjouwer” sufriendo di dysenterie a ser haya riba caya y tabata muriendo, segun a keda skirbi. A pidi polis pa hibe warda y pa dune cuido. Cuatro dia despues, dia 16 di juni, el a muri. Varios hende tabata sufri di dysenterie y di habrimento di barica (scheurbuik).

PERIODO SIN DOCTER NA ARUBA

Aruba a conoce un periodo entre 1886 y 1889 cu no tabata tin docter na Aruba y pa falta di atencion medico tabata tin hende cu a muri tambe. Tabata tin varios personahe entre nan gezaghebber, docter y pastoor cu muri.  Den e periodo tabata tin si algun docter interino y hasta docter cu a wordo retira di su puesto.

Algun di e personahenan cu a muri den e periodo ey na Aruba tabata Jacobus C. Jaarman y tabata dia 25 di september 1886 cu gezaghebber a pone Gouverneur na altura di esaki.

Gezaghebber Michael de Veer a muri na Hulanda y tabata dia  15 di december 1888 cu gezaghebber na Aruba a lesa den Curacaosche Courant cu e gezaghebber Michael de Veer a muri na Hulanda y el a pidi tur doño di barco den waf pa hisa bandera halfstok.

DR. FITZSIMONS A MURI NA CORSOW

 

Dr. Fitzsimons tabata traha na Aruba y el a bira malo te cu mester a bini otro docter pa tuma su trabao over temporalmente. Dia 22 di september 1888 a yega Aruba for di Corsow, D. van Gelder, officier van Gezondheid 2de klasse y su esposa. Nan a bay examina Dr. Fitzsimon y a constata cu Dr. Fitzsimons ta for di peliger y mester di sosiego. Pero casi tres luna despues el a bira malo atrobe.

Tabata dia 19 di december cu a keda nota cu Dr. Fitzsimons tabata hopi malo atrobe  y e dia siguiente dia 20 el a bira peor. A dicidi di mande Corsow cu schoener Arend.

Tabata 9 dia despues, dia 28 di december cu noticia a yega Aruba cu Dr. Fitzsimons a muri y a pidi gobernador mes ora pa percura pa Aruba haya otro docter mas lihe posibel.

Esaki pa motibo cu tabata tin basta hende malo y no tabata tin docter pa atende cu nan.

Un siman despues, dia 6 di januari 1889 gezaghebber a skirbi gobernador encuanto e situacion na Aruba sin docter y cu tin varios persona muriendo.

E situacion sin docter a keda te cu na februari a haya un docter interino.

DR. MULLER A DURA 3 LUNA

Dia 12 di februari 1889 officier di Gezondheid 2de klasse D.J. A. Gijzen a yega Aruba como interino y dia 19 di juni Dr. Muller a yega Aruba pa temporalmente encarga su mes cu salubridad

Varios persona ta ser menciona cu den e periodo ey a perde nan bida y loke lo a pasa cu nan.

Dia 7 di januari un mucha homber a muri pa falta di atencion medico.

Un siman despues a keda anota cu apesar cu gezaghebber tin un klerk cu e ta paga for di su mes saco, e no por haci e trabao debi na cantidad di hende cu ta bin pa bishita y cu tin tur sorto di keho.

E dia aki, dia 14 di januari 1889 pader Helling a cay di cabay y keda lesiona.

Un muher di edad halto tambe a yega cerca gezaghebber cu reclamo. El a cay di burico. Gezagehebber a dune poco placa y mand’e pa Sra. Wieske dune un tratamento.

Dia 7 di februari, un muher a muri durante parto ya cu no tabata tin docter pa yuda.

Dr. Muller sinembargo no a keda Aruba mucho despues di su yegada na Juni ya cu a dicidi cu lo retire y kita di dje tambe maneho di botica di gobierno.

Tabata dia 17 di augustus cu gobernador a wordo poni na altura cu ta recomendable pa no laga e botica den man di dr. Muller, despues di a avisa cu lo dune su retiro.

Diezun dia despues, dia 28 di augustus, e docter a wordo poni na haltura di su retiro y cu e botica ta wordo hiba pa cas di gobernador y cu Dr. Muller mester percura pa e ta na Corsow dia 12 di september pa haya barco pa bolbe Hulanda.

Ningun caminda tabata tin anotacion pa indica kico e docter por a haci malo.

Pero si cu despues cu Dr. Muller a bay di Aruba, e isla a keda sin docter y dia 26 di october gobernador na Corsow a ser poni na altura cu falta di un “geneesheer” na Aruba ta wordo sinti mas y mas y cu esaki ta trece familianan den desesperacion y cu nan ta sufriendo.

BAN TRAHA HOSPITAL GENERAL

Dia 27 di november Dr. H.Ferguson, officier di gezondheid 2de klasse di garnizoen Curacao, a yega Aruba pa temporalmente encarga su mes cu cuido medico.

Ta dia 21 di februari 1890 cu Dr. Joseph Fernandez a yega Aruba y a keda nombra como docter di gobierno.

Mester menciona aki, cu ta for di dia 6 di december 1867 decision a ser tuma caba pa forma un comision pa funda un hospital general na Aruba. Awor a traha riba dje y mester bini cu reglamento y bin cu lista pa firma donacionan. E comision aki a ser presidi pa Bochard Specht Croes y P.J.C. Lampe cu a bira tesorero/secretario.

                             Juby Naar

- Advertisement -

DUNA COMENTARIO

Please enter your comment!
Please enter your name here