Home General Dialogo Social ta e vehiculo pa cualkier pais cu kier progresa y...

Dialogo Social ta e vehiculo pa cualkier pais cu kier progresa y tin consenso pa tuma decision

0
0
SHARE
- Advertisement -

ORANJESTAD (AAN) – Matutino DIARIO a acerca señor Rudy Geerman, presidente di e Federacion di Trahadornan di Aruba (FTA), relaciona cu Dialogo Social y su funcion.

Na prome lugar el a subraya cu e funcion di Parlamento y di e Parlamentarionan ta esun di mas halto cu nos Constitucion conoce.

A base di esey ta cu pueblo ta vota pa forma Parlamento, y di eynan ta forma gobierno segun e reglanan di partidonan politico cu ta elegi nan gobernantenan.

E lider di FTA a remarca cu ni un momento so e autoridad di Parlamento por worde discuti, pasobra legalmente e ta asina.

Señor Rudy Geernan a acentua cu locual ta preocupa su persona ta cu tin parlamentarionan ta kere cu democracia ta bay eleccion cada cuatro aña y ta cla.

El a señala cu loke ta preocupante ta locual por ehemplo Parlamentario mr. Bikker ta papia, cu un organizacion no ta duna informacion na miembronan di PDR, y e ta puntra ta ken sr. Bikker ta, pasobra pa su partido politico e unico hende cu ta papia ta su persona.

E presidente di FTA a indica cu e ta lamenta hopi e expresionnan di señor Bikker, y e ta haya cu esaki ta algo serio y e ta puntra cu si bin un gobierno cu tin e signature di PDR, esey lo nifica cu Dialogo Social lo worde elimina?

El a señala cu si sigui e desaroyonan cu tin rond mundo, y entre otro locual Organizacion Mundial di Trabao (ILO) ta pone semper como prioridad, pa purba trece Dialogo Social den tur su paisnan miembro, y e mes a bay diferente reunion di e organizacion unda cu a trata e tema aki, y no ta asina cu Aruba como pais chikito tin cu bisa cu aki esaki no por pasobra Parlamento so ta conta.

El a agrega cu ora el a scucha Parlamentario Maduro di MEP papia, esaki ta lubida cu na aña 2002, su mes partido cu tabata den gobierno e tempo ey, nan a bin cu e prome acuerdo riba un dialogo nacional cu FTA tambe a firma.

Rudy Geerman a enfatiza cu cualkier acuerdo cu ta worde firma den Dialogo Social tin cu bay Parlamento y Parlamento tin tur prerogativa y autoridad, pa sea bisa no, haci cambio of aproba. Consecuentemente, ni un momento so, e structura di Dialogo Social lo kier tuma e rol di Parlamento over, y nunca esey ta e intencion ni lo por tampoco segun ley.

El a agrega cu semper, e organizacionnan sindical cada bez cu tin eleccion na Aruba, tabata yama tur partido politico cu ta participa den eleccion, y ta duna nan, nan punto di atencion di gobernacion.

Un di e puntonan cu tin prioridad riba e lista sindical, tabata Dialogo Social. Señor Geerman ta acentua cu semper nan a boga pe, y na 2002 un intento a worde haci, bao mandato di ex-prome Minister Oduber, pero e no por a sigui posiblemente pa motibo di falta di confianza mutuo, pero Gabinete actual bao direccion di Premier mr. Mike Eman a dicidi cu nan si ta tuma e caminda ey.

Dialogo Social, segun e lider sindical, ta duna mas aporte y cualkier decision cu gobierno kier tuma ta worde consulta cu mas gremio, y e gremionan ta consulta internamente. FTA na momento di tuma cualkier decision grandi ta pone su delegadonan miembro na haltura di dje, pasobra esey ta un mandato di nan Congreso.

Señor Rudy Geerman a subraya cu tin resultado den esaki, e fruto ta un sistema nobo di intercambia idea y cu aunke e no ta cana cu e ligereza desea e ta bayendo den un bon direccion, y esaki ta e prome piedra cu a worde poni pa mustra otro paisnan na momento di bay cualkier encuentro di ILO, FTA ta worde invita pa duna discurso tocante e experiencia di Dialogo Social na Aruba.

E sindicalista a subraya cu esaki ta e vehiculo pa cualkier pais cu kier progresa y kier consenso.

- Advertisement -

DUNA COMENTARIO

Please enter your comment!
Please enter your name here