Ryan Maduro cu informacion:
ORANJESTAD (AAN) – Diabierna mainta Fundacion E Faro, a convoca un conferencia di prensa, den cual su presidente, señor Ryan Maduro, a hiba palabra.
E conferencia di prensa tabata pa presenta e programa di e fundacion relaciona cu e Dia Mundial di Aids 2012, cu ta wordo conmemora dia 1 di December.
E lema pa e aña aki ta “Usando bo voz, usando bo man, pa un mehor mañan” y e programa mes tin como tema: “Pelukeronan contra Aids”.
Manera ta conoci e Dia Mundial di Aids ta un iniciativa cu a cuminza hopi aña pasa, y e ta wordo presenta rond mundo riba dia 1 di December y e aña aki ta celebra mas cu trinta aña di e descubrimento di e virus “HIV-AIDS”, cu a cuminza afecta mundo en general den cantidad hopi grandi di caso.
Kico ta “Pelukeronan contra Aids” tin e lema “Usando bo voz, usando bo man pa un mehor mañan” cu a wordo scogi basicamente pa por trece dialogo den comunidad tocante e problema y realidad di HIV-AIDS.
Papiando di pelukeronan, nan ta uza nan man cu ta nan talento y nan herment di trabao y nan voz pa nan por yuda disemina y presenta informacion y educacion riba HIV-AIDS na Aruba.
E programa “Pelukeronan contra Aids” a cuminza na aña 2001 na Zuid Africa, na 2005 Fundacion Loreal y Unesco a crea e programa “Hair dressers against AIDS” cu a wordo fomenta atraves di nan red “Profesional programs division”.
Na 2008 e programa aki a wordo estrena mundialmente, den e Conferencia Mundial di Aids cu a tuma lugar na Ciudad di Mexico den e Aldea Global.
Ryan Maduro a menciona cu na e momentonan aki tin mas di 1.3 miyon di profesionalnan di pelukeria rond mundo cu ta participando den e programa aki. Na Aruba e programa aki a wordo presenta pa prome biaha na aña 2009, como iniciativa di dos miembro di Fundacion El Faro, cu ta sra. Lativa Mercera di DBZ y sr. Henry Valdez, y e programa a draai un par di aña den Cache Beauty Salon.
E meta ta pa difundi den cantidadnan hopi grandi, e conocimento basico tocante HIV-AIDS, y di e forma aki brinda un mensahe di prevencion masivo, kiermen no solamente via medionan di comunicacion pero constantemente, y tambe cu e mensahe di no discriminacion contra esnan cu ta biba cu e condicion di HIV-AIDS.
Ryan Maduro a aclarea cu enfasis cu e campaña aki no ta uno pa pelukeronan pero e ta un campaña cu pelukeronan, como agentenan di cambio como aliado pa asina trece informacion basico.
Maduro a subraya cu un pelukeria ta un ambiente di acercamento y contacto social, unda cu e relacion di confianza ta wordo establece entre e pelukero y su cliente.
El a subraya cu tur hende tin un pelukero cu nan conoce, y nan sa mas secreto di un cliente. Esey kiermen cu hopi biaha e malesa di HIV-AIDS por wordo preveni a base di educacion y duna informacion y e pelukero por sirbi como agente di educacion y prevencion pa cu su clientenan.
Na Aruba tin mas cu cien pelukeria dunando servicio na e momentonan aki, y si multiplica nan pa e cantidad di pelukeronan cu ta traha den nan, hunto cu nan clientenan cu ta bishita nan tur dia, por imagina nos mes cu e cantidad di informacion y educacion cu nan por aporta, ta impresionante.
