ORANJESTAD(AAN):Doñonan di Super Food tin tur confiansa den economia di Aruba. Nan a duna muestra di esaki den inverti decenas di miyon den nan tienda nobo. Un tienda supermoderno na unda e tene hopi cuenta cu e aspecto energia duradero.
Asina e construccion ingenioso di e un dobel dak ta traha di tal forma cu e parti ariba ta proteha e edificio contra e solo. Meimei di e dos daknan tin un espacio di 2,5 meter cu ta laga e biento supla eyden y percura asina pa e edificio no bira hopi cayente.
Un proyecto unico cu a resulta di ta e proyecto mas duradero den region Caribense. Prome Minister Mike Eman hunto cu Team BoBario diahuebs ultimo a haya un recorido amplio den e luga compaña pa director di Super Food Jack Bult. A pasa den delaster un parti di e edificio, hasta den e magazijn y caminda ta tene e batanan na un cierto temperatura.
Tambe a ‘inspecciona’ e parti na unda ta corta berdura y fruta, e carniceria, e espacio na unda ta corta y empakete beleg, e departamento di keshi y bebida y asina por sigui. E di dos piso ta unda ta bende tayo, glas, muebles y mucho mas. Un tienda espacioso cu un amplio surtido na unda e palabra magico ta higiena. Prome Minister Eman a mustra gran interes y a keda impresiona pa tur loke el a mira y tende durante e tour den e tienda.
Loke ta espectacular ta e tanki grandi den cua e awa di condens cu ta bin di e freezernan ta wordo intercepta. E tanki aki por carga te 600 mil liter di awa cu ta wordo uza pa muha e matanan, pa e bañonan y pa e fontein grandi dilanti di e tienda nobo di Super Food. E panelnan solar cu tin riba e daknan ta pa keinta e awa pa esaki no bevries.
Eman ta satisfecho di e hecho cu contrario na varios pais den mundo, na Aruba e clima di inversion ta asina positivo cu mas y mas ta invertiendo sumanan cuantioso den nos isla dor di inversionistanan cu tin tur confiansa den e gobierno aki.
Un clima cu a wordo crea dor di e actual gobierno cu entre otro a reinstitui e investeringsaftrek y a trece cambionan den e regimen fiscal. Na final di e recorido den e tienda Prome Minister Eman y Team BoBario a wordo ofreci un lunch dor di director di Super Food Jack Bult. Un gesto cu a wordo hopi aprecia.
