Home General Ramon Wilson: Paraliza y a biba pa canta di esaki !

Ramon Wilson: Paraliza y a biba pa canta di esaki !

4
0
SHARE
- Advertisement -

No mucho tempo pasa, papiando di varios di nos artistanan cu a biba na St. Maarten y cu a bay laga nos, nomber di Ramon Wilson a cay.

E no a bay laga nos, pero tabata hopi cerca.  

Un di nos artistanan cu a mira morto den cara, y a dicidi pa keda na mundo.

Ramon ta bon conoci na Aruba, y pa esnan cu e nomber no ta bisa mucho awendia, mi por menciona “Ramon and the Family Brass” cu si ta conoci pa hopi y pa su bishitanan riba nos isla y su exitonan grandi.  Prome cu esey e tabata tin tambe “Superfly brothers”.

Esnan di San Nicolas cu ainda no por bin bij, mi por bisa: “boso ta corda su tata, taxista Long Gun?”

Ramon a haya un desgracia di trafico na Francia y a keda paraliza dia prome di augustus 1988. Recientemente den “WEEKender’ di e site di e corant  Daily Herald un relato grandi a wordo skirbi di su persona .  

E ta corda e dia di su desgracia bon. Kende lo lubida esey? E dia cu a cambia su bida pa semper.

E desgracia cu auto na Francia  cu a kibra su garganta, y lague sin por move su mannan ni su pianan.

Pero awe e ta move y hari y canta. Su voz poderoso y placentero ta e marca di “Sweet Chocolate Band” cu ta toca  di 8 or anochi te oranan laat tur anochi (cu excepcion di diamars)  den Cheri’s Cafe, un di e establecimentonan nocturno mas popular di St. Maarten, si no ta esun mas popular.

RAMON Y SU

 

MUSICA

Entre su bendicionnan, incluso su familia, amigonan y hendenan di St. Maarten, e ta atribui su triunfo riba su limitacionnan fisico, na musica. “Musica ta dunami forza y animo”, e ta bisa.

E ta conoci pa musica, como compositor dui masha hopi cancion den curso di añanan. “Mi ta stima e banda aki y mi ta stima Cheri’s” el a bisa den un entrevista den patio parti patras di Maho Restaurant.

Un persona clave den su bida, cu a dune tur sorto di sosten ta Cheri.

“Mi tin cu dune [Cheri Batson] tanto gratitud pa a dunami e oportunidad di progresa den bida. Bo sa, e restaurant aki ta formidable y mi tin e oportunidad di ta parti di dje. Si… mi ta stime masha hopi  pesey mi ta tene mi mes na e trabao aki”.

Wilson tin un creatividad natural pa musica, pero cu tempo el a cambia; mescos cu su musica e tambe ta desaroya su mes y su estilo. Tempo cu den decada 90 tur cos tabata draai rond di Cheri’s  e tabata por a improvisa liricanan sin haci esfuerzo. “Den e dianan ey mi tabata manera, ‘dunami e musica, mi por canta tur cos riba dje. Pero awor mi tin su skirbi tur cos, mi ta skirbi hopi”.

Su exitonan grandi ta inclui “Traffic jam” “Let’s Dance” y su propio letranan  riba “Lambada” – fresco y asina bailable.

“Mi a skirbi masha hopi cantica. Hombo, tanto cu mi no ta corda e cantidad”.

Un cancion cu e ta masha conoci pe, pero cu e no a skirbi, a wordo componi pa su swa Spencer Jeffers, tocante con el a triunfa riba adversidad y biba pa canta di esaki. E cancion ta menciona: “Mi a pasa den un caminda largo”.

DIOS Y TERAPIA

Con el a logra usa su mannan y su pianan atrobe, el a contesta yen di ironia: “Mi tabata na e lugar corecto na e momento corecto”.  Awor e ta hari, pero tabata solamente cu determinacion fuerte y hopi trabao duro awor e por para, cana cu kruk y biba su bida.

“Tur cos cu pasa cu bo, bo mester trata na – manera nos ta bisa– fria cabez, duna bo cerebro tempo pa acepta kico a pasa cu bo. Ora bo cerebro no kier acepta, esaki ta pone hopi hende djis bay para den skina. Bo tin cu acepta loke a pasa y despues enfoca  riba con pa surpasa  esey y con pa haci cosnan. Di momento cu mi a haya e desagracia aki, mi a duna dios mi alma. Mi a bis’E cu loke e kier haci cu mi, mi t’aki pa esey”.

E tabata paraliza di garganta bay abao mas o menos tres aña y drumi riba cama pa hopi tempo, e ta corda. Eventualmente el a haci progreso , prome cu uso di su mannan y despues habilidad pa cana.

Trahando diariamente cu terapista fisico Stef Rumeser na St. Maarten Health CareClinic, el a haya su bida bek.

“E tin mannan di magia”, e ta bisa di Rumeser. “E ta mi ruman”, el a a agrega.

“Terapia ta duro, esey ta berdad. E ta kita hopi di bo tur dia. Hende no ta realiza cu tin musculonan cu por haci cosnan cu hende no sa cu nan por haci. Pero e potencial tey, bo djis tin cu siña cosnan di nobo. Awor mi ta traha riba cosnan mimes ora mi sinti cu mi mester traha poco. Mi tin cu sosega tur dia tambe. E curpa ta exigi esaki. Pero mi ta djis forza mi mes y haya tur cos bek. Mi ta asina gradecido, musica ta move mi, e ta saca bo espirito interno; e ta hacibo limpi.  E ta cambia bo beis, relahabo , e ta yenabo cu stimacion Ta berdad loke nan ta bisa: Musica ta e yabi di bida”, mi ta gradici Dios di a dunami e arte ey”.

 

PODER DI

 

MENTE

 

Ramon Wilson a yega St. Maarten for di Aruba cu 13 aña di edad. El a hunga baseball como hoben , tercera base y pitcher, y e ta orguyoso cu el a wordo hasta selecta pa bay hunga cu Cincinnati Reds.

El a sigui den negoshi di famia y a bira barbero y hopi conoci di por pela masha bon mes  y duna bon conseho.

“Tur hende riba e isla tabata bisa ‘ ningun hende por pela manera abao’. Hasta Sr. Henri Brookson tabata bin pela cerca mi, y nos lo conversa y mi ta dune punto. Si.. mi tabata su barbero.”

Ora e considera otronan cu lo ta sufriendo y pasando den retonan fisico, e ta ofrece speranza y bisa cu ‘enfocando y aceptacion ta yabi di progresa”.

“Importante ta pa conoce bo mes; e ora ey bo por haci hopi cos. No preocupa si bo no por move na e momento aki, bo por move mañan. Pero bo tin cu analiza bo mes, sinta y cuminza enfoca riba kico ta pasando cu bo. Bo tin cu enfoca; poder di mente ta eynan. Tur hende tine yabi ey den nan cerebro. Esaki ta loke mi ta bisa hende , conoce bo mes y enfoca. Tur hende ta poni riba e mundo aki pa haci algo, bo no ta aki pa haci nada, bo sa” y aki e ta cuminza hari. “mi ta kere ta pesey nan ta bisa cu mi ta un hende sabi. Kizas esaki ta e parti final.  Tempo mi tabata na Hulanda, e docter a siñami algo y a tumami hopi tempo pa compronde. Bo curpa tin hopi diferente musculo den dje y nan por siñabo ki musculo ta move; nan lo siñabo con pa move nan. Pues, no tene miedo cu si algo pasa cu bo, cu bo lo ta den skina resto di bo bida. Lanta! Bay gobierno y bisa nan cu bo meter di yudanza. Bo no ta sin speranza. Bo sa? Mi a topa hende cu no por haci nada; solamente un poco movecion den garganta. Pero cu e movecion aki nan a siñe tur dia. El a usa e poco movecion aki pa stuur su rolstoel y e por a bay mas lihe  cu mi por a cana! Pues bo no ta un hende sin speranza, tin algo cu bo por haci”, el a finaliza bisando den e entrevista cu — thedailyherald.com “ . Aki un luna mi ta spera di bishita Ramon, sea na su residencia of na Sheri’s scuchando su musica.

                                       Juby Naar

- Advertisement -

DUNA COMENTARIO

Please enter your comment!
Please enter your name here