ORANJESTAD (AAN): Departamento di Informatievoorziening en Automatisering (DIA), cu ta resorta bou di Ministerio di Asuntonan General, bou encargo di su director Sr. Ing. Carlos Bermudez, ta informa cu Gobierno di Aruba ta conta cu un otro departamento mas, esta Departamento di Labor y Investigacion (Directie Arbeid en Onderzoek (DAO)), cu a finalisa upgrading di nan sistema di computer.
Mas o menos 50 computer y un server cu capacidad grandi y cu e ultimo version di software a worde poni den produccion, pa asina por duna un miho servicio na e pueblo di Aruba.
Departamento di Labor y Investigacion ta e departamento cu ta encarga pa traha y revisa e maneho riba e mercado laboral. Maneho ta worde traha of revisa a base di investigacion nan ehecuta.
Tambe e ta unda trahadonan of dunadonan di trabao ta acudi ora ta trata di un conflicto na pia di trabao. Departamento di Labor y Investigacion ta encarga tambe cu e inspeccion riba e mercado laboral pa por controla si negoshinan ta cumpli cu nan obligacionnan manera ley ta stipula.
E proyecto di upgrading dje sistema di computer na DAO a worde ehecuta cu e meta pa e empleadonan di Departamento di Labor por funciona na un manera profesional y mas eficiente.
E proyecto a worde ehecuta pa e departamento di DIA (Directie Informatievoorziening en Automatisering) y como lider di proyecto a fungi sr. Ing. Gregory Trim. Hunto cu e lider di proyecto a forma parti di e ICT team Sr. Carl Dijkhoff, BSc., Señora Suzette Ling, MSc., Sr. Hoon Ying Chai, BSc. y Señora Liria Figaroa, BSc. E team di expertonan di DIA a percura pa e proyecto worde realisa den un tempo cortico.
Un gradicimento ta bay na tur esnan envolvi den e proyecto aki, Gobierno di Aruba, Minister di Turismo, Transporte y Labor, Sr. Otmar Oduber, B.Sc., kende a percura pa e parti financiero y pa e parti di aprobacion worde realisa den un tempo cortico. Na e ehecutivonan di DAO, director Sr. mr. drs. Franklin Kock y Señora ir. Yvonne Lee-Perez (lider di proyecto pa DAO), y na tur e empleadonan di DAO.
DIA lo sigui haci su esfuerso pa upgrade mas departamento di Gobierno den e simannan venidero, pa asina por brinda e pueblo di Aruba un servicio di calidad halto, conforme e maneho, procedemento y vision di Minister di Asuntonan General, Sr. Mr. Mike Eman.
