ORANJESTAD (AAN): Diaranzon alrededor di 2:30am, habitantenan di Pos Chiquito # 89 a lanta for di soño forsa door di holor di huma y candela den nan cas.
Un camber henter a bay perdi pa motibo di candela y demas cambernan den cas a ricibi daño di huma y awa.
Bomberonan cu a presenta rapido na e sitio a sa di domina e candela y preveni pa el a expande mas.
Investigacion preliminar na e sitio mes ta mustra cu e chens ta grandi cu aki ta trata di un candela intencional. E sospecho aki a bin debi cu a haya algun articulo benta abou den veranda y den cura, cu ta duna indicacion cu un of mas persona a yega e cas cu intencion di kim’e cu e habitantenan aden.
E sospecho a bira mas grandi ora cu a topa cu un celular estilo “BlackBerry” riba e muraya di e cura di cas siendo cu ningun di e habitantenan ta uza e modelo di celular ey. Cu esaki ta sospecha cu un hende a bin cende nan cas na candela y a bay laga su BlackBerry atras tambe!
Recherche awor ta investigando e caso serio aki. Esun cu haci su mes culpabel na e delito di cende cas na candela intencionalmente cu habitantenan den dje lo mester enfrenta acusacionnan serio di cual tin castigo pisa riba dje. Separa di e delito di cende candela intencional, husticia lo por acusa un sospechoso asina di intento di asesinato tambe.
