Home General Gobierno ta saca ingredientenan di mocion di PDR presente como logro di...

Gobierno ta saca ingredientenan di mocion di PDR presente como logro di Dialogo Social

0
0
SHARE
- Advertisement -

Lider mr. Andin Bikker disgusta:

ORANJESTAD (AAN) – Parlamentario mr. Andin Bikker, lider di fraccion di Partido Democracia Real, a menciona den conferencia semanal di prensa, cu durante e tratamento di presupuesto 2012 na Februari, PDR a propone pa gobierno bin cu tarifanan di coriente reduci pa e canchanan di deporte rond di Aruba.

E fraccion di AVP a rechaza e mocion aki pero aworaki por ripara cu nan a tume hinke den e Dialogo Social y ta pronk cune y presente comosifuera cu ta nan a pensa riba dje.

Parlamentario mr. Bikker a menciona cu e tin entendi cu drs. Paul Croes, presidente di Parlamento a propone pa bin cu un ley pa loke ta trata Dialogo Social y e ta kere cu berdad mester hinca esaki den ley pasobra mester por defini un rato ta kico ta bay Dialogo Social cune, y kico ta e tarea di Parlamento.

Esaki pasobra den Parlamento ta bin cu mocionnan cu ta algo constitucional como representante di pueblo, elegi pa votonan den eleccion, y sinembargo gobierno ta tuma e mocion pone den freezer y despues ta bay Dialogo Social, saca e ingredientenan di e mocion pone den e acuerdo di Dialogo Social y presente como su logro.

Parlamentario mr. Bikker a subraya cu te aworaki e no por caba di compronde e dinamismo entre Parlamento, Dialogo Social y Gobierno, pasobra e ta kere cu e temanan cu nan ta trata den Parlamento y cu ta debati riba nan cu mocionnan, entre otro, ta cosnan cu no tin nodi di bay Dialogo Social cu nan.

- Advertisement -

DUNA COMENTARIO

Please enter your comment!
Please enter your name here