E Revista Oficial di Aruba su Carnaval
ORANJESTAD (AAN): Minister di Turismo, Otmar Oduber tabata invitado di honor pa desvela e portada di e revista di Carnaval, Bacchanal, unda cu hunto cu Reina Hubenil di TOB y di Carnaval ’58 a lansa e revista.
E fecha di ayera lo keda marca den historia mirando cu a lansa e revista popular oficial di Carnaval aki riba dia 12 di luna 12 2012, 12 minuut y 12 seconde.
Minister Oduber a duna di conoce cu Bacchanal a bira parti intergral di Aruba su Carnaval, y un elemento di Carnaval cu no por keda afor.
E ultimo añanan tur hende ta busca nan Bacchanal pa asina nan por sa kico tur ta tuma lugar den e temporada carnavalesco aki. E revista a bira un recuerdo precioso di e carnavalnan anterior. Uno unda cu tur grupo di canavalista nan ta semper mira bek den dje pa recorda kiko tur nan a haci e anja anterior.
Minister Otmar Oduber a recorda cu den pasado tabatin simplemente un papel cu e programa di Carnaval riba dje y ta contento cu esaki a amplia den e tradicion cu awe yama Bacchanal. El a remarca tambe cu Bacchanal ta expone e comerciantenan cu ta re-enforsa nos Carnaval.
Igualmente e mandatario a haci uso di e oportunidad pa aplaudi Sr. Gibi van der Hans pa e tremendo iniciativa y dedicacion. Danki na su esfuerzo a logra hinca e parti contemporaneo di nos Carnaval, den e epoca nobo y cu ya caba ta celebrando 15 aña activo den nos Carnaval.
Minister Otmar Oduber a indica cu e revista aki ta marca nos cultura den un solo edicion. Unda cu no solamente nos hendenan ta haci uso di esaki pero cu sigur hopi turista cu ta facina cu e Carnaval di Aruba tambe ta busca nan Bacchanal.
Sr. Gibi can der Hans a haci entraga di e prome ehemplar di e revista na Minister di Turismo, cu tin un contenido amplio di nos Carnaval como tambe e programa oficial di e temporada dushi aki.
