Home General Aruba su orguyo den baseball Hulandes “The Fox” Martinus y Minister Richard...

Aruba su orguyo den baseball Hulandes “The Fox” Martinus y Minister Richard Visser ta hiba un combersacion ameno

0
0
SHARE
- Advertisement -

ORANJESTAD (AAN): Minister di Salud y Deporte, dr. Richard Visser tabatin e placer recientemente di topa y hiba un combersacion ameno cu Eithel Calvin Martinus, un di e Arubianonan cu mas a destaca den e deporte di baseball na Hulanda. Sr. Martinus, kende cariñosamente ta worde yama “Wim” y popularmente ta conoci como “The Fox”, ta conoci na Hulanda como un pelotero y coach cu un carera admirabel.

E mandatario y The Fox, kende tabata na Aruba cu vakantie, a intercambia di idea y a discuti algun topico y factor interesante di baseball. Minister Visser tin admiracion pa Sr. Martinus su logronan y tabata contento di por a papia cun’e tocante e desaroyo di baseball na Aruba, como tambe scucha conseho di Sr. Martinus ariba e tereno aki.

Minister Visser y Aruba henter ta orguyoso di nos deportistanan cu ta destaca localmente y den exterior y e bishita aki tabata un forma bunita pa comparti recuerdo cu The Fox, kende ta un deportista ehemplar. Aña 2012 tabata un aña importante pa deporte na Aruba y nos hobennan pelotero a destaca asina bunita den World Series den diferente categoria, cual a duna un boost tremendo na e deporte aki.

Minister Visser a gradici Sr. Martinus pa su bishita y combersacion ameno y e ta spera di wak The Fox cu mas frecuencia riba nos isla.

Wim Martinus a cuminsa cosecha exito for di hopi jong, tempo cu el a cuminsa hunga baseball como mucha chikito den su districto di San Nicolas. El a muda pa Hulanda y aya el a hunga 20 temporada, durante cual el a score 302 careda, empuha 419 y a mantene un averahe di 325. Wim Martinus a forma parti di e serienan Hulandes 12 biaha y na 1999 el a dicidi di retira y cuminsa den su funcion nobo como assistant coach. E tentacion a keda grandi y na aña 2000, Wim a subi veld un biaha mas. Na aña 2005, el a retira pa bira head coach di Sparta/Feyenoord.

Apenas un aña den e funcion na Sparta/Feyenoord, The Fox a tuma un otro decision importante den su carera, cual tabata pa accepta di bira coach di e Team Nacional Hulandes.Como coach di e Team Nacional Hulandes, Sr. Martinus a guia su team den logronan admirabel: 2006 International Cup; 2007 International European Championship; 2007 Baseball World Cup, 2008 Olympics, 2009 World Baseball Classic y Baseball World Cup y 2010 European Championship.Aruba ta orguyoso di Wim “The Fox” Martinus, un yiu di tera kende a nace y crece na San Nicolas, un deportista cu alma y curason pa su deporte y su isla natal, Aruba.

- Advertisement -

DUNA COMENTARIO

Please enter your comment!
Please enter your name here