Home Hudicial Corte Superior ta ordena pais Aruba pa considera oferta di Vercas Aruba,...

Corte Superior ta ordena pais Aruba pa considera oferta di Vercas Aruba, pa proyecto di Green Corridor

0
0
SHARE
- Advertisement -

 ORANJESTAD    (AAN): Diamars hueznan di hof a duna nan veredicto, den un caso di apelacion entre e compania Colombiano estableci na Aruba yama ‘Vercas Aruba’ (Vergel Y Castellanos S.A) y pais Aruba hunto cu otro compania Colombiano estableci na Aruba esta Odinsa (Organizacion De Ingenieria Internacional).

Pais Aruba a wordo representa pa abogado D. Canwood, Odinsa a wordo representa pa abogado Z. Arends Marchena, mientras cu Vercas a wordo representa pa abogado G. de Hoogd.

E caso a bin dilanti, despues cu Vercas su oferta den un destaho publico pa e proyecto grandi di “Green Corridor Aruba” riba 17 di September 2012 a wordo rechaza.

Motibo di e rechazo di parti di pais Aruba tabata cu e representantenan di Vercas lo a entrega e oferta mucho lat.

Gobierno di Aruba a indica cu tur compania interesa tabata tin di 10’or di mainta dia 17 di September te cu 12’or di merdia di mesun dia, pa entrega nan oferta na DOW.

Riba e fecha ey 4 representante di Vercas a yega DOW 12:03 di merdia y a entrega nan oferta 12:08.

Pais Aruba a considera esaki como lat y e oferta a wordo rechaza.

Door di esaki Odinsa a resulta du ta esun cu a haya e proyecto pa ehecuta.

Vercas no tabata di acuerdo y a cuminza un caso sumario cu a tuma lugar riba 11 di October 2012.

Den e caso sumario e compania a splica cu motibo cu nan tabata lat tabata entre otro door di e hecho cu Diabierna anochi dia 14 di September alrededor di 10’or pais Aruba diripiente a bin cu un cambio den e proyecto.

E cambio aki tabata encera cu e crusada di Seroe Tijshi lo no forma parti di e Green Corridor.

Segun Vercas, e cambio aki a bruha henter e programa, cu a conduci na cambionan cu mester a wordo hasi cu a tarda.

Banda di esaki Vercas a bisa cu tabata tin un tardanza ora cu nan tabata saca copia di e documentonan cu mester a wordo entrega.

Pais Aruba a bisa cu e cambio tabata un proposicion cu Vercas mes a hasi.

Vercas a pidi huez pa ordena pais Aruba pa acepta su oferta pa e proyecto y no otorga esaki na otro compania, sin cu esun di Vercas wordo considera.

Huez despues di a evalua tur cos, a rechaza e peticion di Vercas.

Sinembargo Vercas riba 13 di November a entrega un peticion di apelacion, pa asina e caso wordo trata den corte superior.

Riba 18 di December e caso di apelacion a wordo trata, despues cu anteriormente e diferente partidonan a entrega diferente documento na corte.

Durante tratamento di e caso, a bin dilanti mescos cu a wordo bisa den e caso sumario, cu Vercas despues cu su oferta a wordo nenga, a laga e oferta den un safe na oficina di Notario Yarzagaray.

Asina tur partido por ta sigur cu Vercas lo no por hasi un cambio despues cu e oferta di Odinsa a wordo conoci, pa hasi un mihor oferta sabiendo e oferta di su competencia.

Vercas a splica cu door di e cambio cu pais Aruba a bin cune, 3 empleado a bula bin mesora for di Colombia pa traha dia y anochi riba cambionan cu mester a bin den e oferta, door di e cambionan cu pais Aruba a pone den e proyecto.

Huez despues a scucha ambos banda, a dicta cu e cambionan cu pais Aruba a bin cune asina lat, ta suficiente pa considera e 8 minuutnan lat cu Vercas a entrega nan oferta como no lat.

Pues hueznan di corte superior den nan sentencia Diamars ta ordena pais Aruba pa dentro di 2 dia considera e oferta di Vercas, despues di cual por dicidi ken ta haya e proyecto.

- Advertisement -

DUNA COMENTARIO

Please enter your comment!
Please enter your name here