Home Politica Den Plan pa hospital MEP tin tres preocupacion

Den Plan pa hospital MEP tin tres preocupacion

0
0
SHARE
- Advertisement -

ORANJESTAD    (AAN):  Xiomara Ruiz Maduro di e fraccion di MEP den Parlamento tambe tabata den Parlamentario pa e reunion di e proyecto di ley pa duna apoderacion na Minister di Salubridad Publico pa yega na un acuerdo cu SOGA (Stichting Onroerend Goed Aruba) pa renobacion y ampliación di hospital. Durante e reunion, e Parlamentario a splica den un entrevista, cu nan a haya chens di trece diferente preocupacion y pregunta dilanti. Diferente contesta a bin tambe. Awor nan ta buscando claridad riba e renovacion y expansion.

   MEP tin tres preocupacion segun Xiomara Maduro. E prome preocupación y esun mas grandi cerca fracción di MEP, ta con Gobierno ta bay paga pa e proyecto aki, mirando cu ta trata di un inversión di 252 miyon florin, pero ora di pago cu e interes acerca, e ta surpasa 700 miyon florin.

Si pone acerca, e ta bisa, e componente cu e interés cu por fluctua, hasta por yega na 1 biyon florin. “Mirando e situación financiero di Aruba, mirando e deficit, e buraco cu tin den Finanza Publico, mester pensa bon ki decision ta bay tuma y si nos por cargue,” Sra. Ruiz Maduro a duna di conoce.

   Un otro preocupacion ta e localidad, ya cu nan kier sa si esaki ta e miho luga mirando e inversion miyonario cu ta bay wordo hinca den e proyecto. Fraccion di MEP kier sa for di expertonan si e ta miho localidad ora di calamidad. Nan tabata kier for di comision rampenbestrijding un conseho riba e ubicacion aki, y cual ta e otro opcionnan cu Gobierno a explora, mirando cu varios biaha e area a keda bou di awa.

   Di otro banda, e ta bisa, ta invirtiendo den e infrastructura, pero nan kier sa si e servicio tambe ta bay haya atencion, si e ta bay wordo mehora. El a menciona cu nan ta consciente cu tin un falta di personal, cual lo por bira un problema pa e cuido pero tambe e descuidonan ta tuma luga. El a menciona fatalidadnan cu ta wordo señala den prensa. Basa riba tur esaki kier sa di e Ministernan, kico ta nan pensamento, opcion y solucionnan pa pais Aruba den caso di renobacion y ampliacion hospital.

      Contrario na Parlamentarionan di fraccion berde, Ruiz Maduro ta kere cu e transparencia no ta total ya cu ora di cuminsa reunion tabatin diferente punto di ordo. El a duna e ehempel di su colega Booshi Wever, kende a manda un serie di pregunta y 50 di nan no a wordo contesta.

     Fraccion di MEP no a ricibi algun rapport ter inzage pero no copia. Nan ta prefera di haya un copia pa por hiba un bon debate. Pa finalisa, el a bisa cu despues cu e Ministernan caba di contesta, nan lo formula nan posicion riba e proyecto di hospital.

- Advertisement -

DUNA COMENTARIO

Please enter your comment!
Please enter your name here