Home General Mester continua cu e reunionnan tocante Valero cu a keda suspendi aña...

Mester continua cu e reunionnan tocante Valero cu a keda suspendi aña pasa

0
0
SHARE
- Advertisement -

Lider di PDR cu carta pa Presidente Staten:

ORANJESTAD (AAN) – Den conferencia di prensa semanal di fraccion di Partido Democracia Real, su lider politico mr. Andin Bikker a mustra su duda grandi cu e refineria na Aruba lo bolbe habri.

Parlamentario mr. Bikker a menciona cu PDR ta bay manda dos carta pa Presidente di Parlamento, pa sigui cu un reunion cu a cuminza aña pasa, tocante e tema di ciere di Valero y cu a wordo suspendi pa tempo indefini.

Lider di PDR ta sigur cu mester toca e tema atrobe, y los di esey e ta bay haci preguntanan por escrito na e minister encarga, entre otro, cu Energia.

Esaki pasobra PDR a tuma nota di desaroyonan reciente, unda cu e empleadonan ta señala:

1. Cu un di e powerhousenan a wordo poni na opcion, kiermen na benta, siendo cu nan ta esencial pa e refineria, kiermen desmantelacion aparentemente, ta tumando lugar.

2. Falta seguridad pa loke ta trata brandweer eyden, y aparentemente tin carta for di Brandweer Aruba a wordo manda pa e gerencia di e refineria.

E parlamentario a agrega cu PDR kier sa kico ta exactamente e status di e refineria actualmente, pasobra a bay na un ehercicio di manda cas un gran parti di e empleadonan, y hasta un par a bay Corte.

El a subraya cu semper PDR a keda bao impresion cu lo haci hopi mas esfuerzo pa bin na un reapertura di e refineria, y e ta kere cu gran parti di e empleadonan, contratista, subcontratista tabata tin e mesun expectativa.

E lider di PDR a menciona cu hopi di e empleadonan aki ta acerca su fraccion, pasobra nan a bay hopi “job fair” cu gobierno a organiza, pero nan no ta hayando trabao, of e trabaonan cu nan ta wordo ofreci ta pa un entrada hopi abao, casi salario minimo cu compara cu e entrada cu nan tabata custumbra cune, practicamente ta pone nan evalua si nan ta bay traha den exterior.

Parlamentario Bikker a reitera cu gobierno a haci tur esfuerzo pa bin cu “job fair” entre otro tipo di iniciativanan, pa minimiza e efecto riba nos economia, sinembargo e realidad ta cu hopi hende ta sinta awor na cas cu un pakete cu poco, poco e placa ta cabando, y companianan contratista y subcontratista cu ta mira con nan opset ta baha, y cu nan no ta wak di unda nan ta bay saca e mesun tipo di “turn over” pa por mantene nan negoshinan habri.

Pues, ta preocupacionnan pa cual mr. Bikker ta haya cu e reunionnan cu a wordo suspendi pa loke ta trata Valero, mester bin back y wordo yama pa sigui cu e di dos tanda, y/of pa e preguntanan cu ta bay wordo manda por escrito pa e minister bin contesta nan den un ora di pregunta.

Aunke e no sa con e dignatario su agenda ta, e tematica aki ta hopi importante. Parlamentario Bikker a subraya cu con cu bay bin, ta 12 porciento average di nos producto nacional bruto a cay afo, y esaki ta algo cu los for di e cifranan riba papel pa loke ta trata e macroeconomia, e ta toca nos di biaha pasobra ta centenares di hende ta sin trabao y companianan grandi ta den preocupacion si nan por mantene nan porta habri of no.

- Advertisement -

DUNA COMENTARIO

Please enter your comment!
Please enter your name here