Home General “Rib’un Chill cu Hebbe Hebbe” ta move pa dia 5 di februari...

“Rib’un Chill cu Hebbe Hebbe” ta move pa dia 5 di februari riba parkeerplaats di Postkantoor

1
0
SHARE
- Advertisement -

A cambia e fecha di diaranson pa diamars

ORANJESTAD (AAN): E organizado di Hebbe Hebbe, Manuel da Silva di Manuelito’s Sports Bar a anuncia diamars merdia cu e gran evento “Rib’ un Chill cu Hebbe Hebbe” lo tuma luga otro siman diamars, dia 5 di februari en bes di diaranson.

E anuncio aki a bin despues di diferente reunion, entre otro cu SAC, Polis, cu su patrocinado oficial y tur partner den e organizacion di Hebbe Hebbe. Da Silva a bisa cu a reuni tambe cu Prome Minister Mike Eman, kende el a gradici tambe pa su cooperacion.

   E decision pa bin cu e proposicion pa move Hebbe Hebbe pa diamars, dia 5 di februari a bin despues cu Topcar a anuncia cu nan ta celebra nan di 45 aniversario di existencia riba dia 6 di februari.

E  partnernan den organizacion di “Rib’ un Chill cu Hebbe Hebbe” a dicidi di move nan evento pa permiti Topcar tur espacio pa tene nan evento trankilo.

  Pa loke ta trata “Rib’ un Chil cu Hebbe Hebbe” manera ya e publico ta custumbra, lo tin 5 banda LIVE riba escenario dilanti Postkantoor. Chill a anuncia anteriormente tambe cu como e cerbes oficial di Aruba su Carnaval 59, lo tin hopi regalo special y tambe ora cu zona e bel “Chillin’ Chillin'” tin cerbes gratis pa tur hende gosando di nan Hebbe Hebbe.

   Manuel da Silva a comenta cu ta casi increibel pa kere cu un evento cu a cuminsa como chikito dilanti su negoshi 15 aña pasa, unda cu amigonan y bisiñanan a yega hunto pa un fiesta ey mes, por a crece bira un di e eventonan faborito y mas grandi di Aruba. Aña pasa ta calcula cu tabatin un publico entre 7 pa 8 mil hende. E aña aki no lo spera menos!

  Ta masha hopi hende ta pendiente di kico Hebbe Hebbe tin como sorpresa y e aña aki, pa e celebracion di 15 aña Hebbe Hebbe ta “Rib’un Chill” cu un cantidad di regalo y cerbes gratis y e bandanan Rincon Boyz, Youth Xtreme, Zeta Band cu Tattoo, OREO cu Caiso Monarch Mighty Talent Jr., Basic One cu Janiro y Fellow.

   Marca bo kalender, pasobra bo no por perde e fiesta aki: Diamars, dia 5 di februari, “Rib’un Chill cu Hebbe Hebbe”, Postkantoor na Playa. Bin CHILL cu nos!

- Advertisement -

DUNA COMENTARIO

Please enter your comment!
Please enter your name here