ORANJESTAD (AAN): Un elogio grandi sigur pa e team motoriza di cuerpo policial cu e fin di siman di carnaval a desplega un tremendo trabao.
Esaki ta pa garantiza e seguridad den pueblo pa e trafico cu mester keda uno sigur. Pa algun aña polisnan tabata hopi tolerante cu incumplimento.
Hopi hende ta bebe y despues bay core auto. Den tres dia di actividad manera diahuebs, diasabra y diadomingo a detene durante control un total di 45 chauffeur bebi.
Den e 45 chauffeurnan aki 26 tabata asina bebi cu ley ta permiti pa trek in nan rijbewijs. Awor e dolor mas grandi ta cuminsa caminda cada chauffeur cu a perde su rijbewijs mester bay te cerca fiscal na Ministerio Publico pa atende cu e situacion aki.
E chens ta un multa pisa hunto cu un prohibicion di algun luna. E otronan cu no a perde rijbewijs tambe ta haya un multa y nan nomber ta bay den e sistema. Esey nifica cu si bolbe faya e problema por bira mas serio pa nan.
Banda di Spiraal Rotonde mes tabata tin un chauffeur cu a core medio den verboden, hera dal den palo di luz di DOW y sigui casi dal e brommer di polis benta abao.
E chauffeur aki tabata pata pata. tambe den De La Sallestraat un chauffeur cu su famianan den auto a worde para. E tabata bebi tambe. El a splica y polisnan motoriza a detene. El a ser hiba warda unda e proceso di e test mas pisa a continua mescos cu tur otro chauffeur. Por bisa cu diadomingo so un total di 14 chauffeur a keda deteni bao influencia y 9 a perde nan rijbewijs. Mescos cu e otro polisnan reparti den diferente area den ruta y pafor di ruta pa mantene e seguridad di nos isla, esun di e polisnan motoriza tambe a resalta masha.
