Home Editorial Editorial: CARNAVAL Y POLITICA

Editorial: CARNAVAL Y POLITICA

0
0
SHARE
- Advertisement -

                Nos ta den pleno epoca di carnaval y alavez cuminzando un aña di eleccion, den cual politica ta bay hoga nos su su letanianan. Pueblo Arubiano ta un Pueblo sabi pasobra el a logra separa e dos asuntonan aki categoricamente, disfrutando di su carnaval y preparando su mes pa e embate di politica cu lo bin despues.

                Tur hende sa con carnaval ta, o sea un di e eventonan mas importante di nos isla, y cu a cosecha pa nos hopi exito y admiracion local y den exterior. Nos hendenan a bira expertonan incuestionable den e trahamento di disfraz y e construccion di carozanan y trailernan increiblemente impresionante pa nan buniteza y detayenan artistico. Tur e eventonan cu ta tuma lugar den carnaval ta semper bon atendi, cu un multitud di admiradornan cu ta asisti pa goza e momento y yena nan mes su e alegria di un di e eventonan mas importante di nos isla, y pa hopi hende, hasta e mas importante. Djey ta bin politica! Como cu ta trata di un aña di eleccion, curiosidad lo desplaza e entrega total na e alegria cu carnaval ta ofrece, y lo surgi e expectative grandi pa adivina e posible resultado di e eleccion cu ta na caminda.

                E partidonan tradicional cu lo participa ta bon conoci pa un y tur, y e fortaleza di cada un di nan tambe. E incognita ta keda e lista cu MEP lo bin cune. Evelyn ta hacienda su best pa presenta un lista ganador. Hopi ta bay depende di e candidatonan cu e por convence pa acompañe riba lista. Pa loke ta trata PDR, Andin a crea pa su mes un bon nomber den Pueblo, y awor ta coresponde na dje bin cu un lista di candidatonan cu por dune mas di dos asiento den Parlamento. Un ya ta conoci, si e viahe di Serge cune pa Corsow ta algun indicacion di su intencion pa bolbe participa den politica.  Otro di e ex-participantenan di PDR cu no a laga sa nada te awor di su posible participacion ta Gregory, kende ya a haci e viahe cu Andin mas di tres aña pasa. Si Marisol dicidi di forma un cuarteto cu nan, e posibilidadnan di PDR ta bira hopi grandi.

                AVP, di su parti, no ta sinti cu tin un berdadero  oposicion cu por arebata Gobierno for di dje. E ta basa su mes riba e desorientacion grandi cu tin den MEP actualmente, e abandono di candidatonan cu tabata suma un gran cantidad di voto pa e partido geel, y e lista cu Evelyn ainda mester traha. Te awor no tin nada importante a la bista, y esey ta crea un sentido grandi di confianza den e partido berde. Pero e mesun confianza ey por bira tambe su peor enemigo, pasobra e por crea un sentimento anticipa di triunfo y un seguridad cu ta leu di ta sigur.  Pero, mientras tanto, loke tin e atencion di Pueblo den e momentonan actual ta carnaval, e epoca di alegria y diversion.

                E expectativanan ta grandi cu e carnaval di Aruba lo bolbe supera su mes y bira, un biaha mas, algo gigantesco, tanto den cantidad di participantenan como den e luho di e disfraznan y e tecnica y colorido di e bodypiecenan y carozanan.  E ta un bon evento pa cuminza aña cune. Su musica, su bailenan riba caya, su colorido, su demostracion di e talentonan di nos hendenan, su alegria contagioso, su ritmo, tur esaki den conhunto ta forma e carnaval di nos isla cu ya tin fama mundial, y merecidamente asina. E no ta un cuestion di comparacion cu Brazil o Trinidad o New Orleans, por ehemplo, pero un logro grandi riba su mes di un isla chikito cu ta pone tur loke e tin y por den un acto folklorico ya caracteristico y tradicional di Aruba.

                E intensidad di eleccion mes lo cuminza, segun mi calculonan, despues di Semana Santa, y lo incrementa barbaramente te e dia di deposita votonan den e urnanan cu ta bay determina e ganador(nan). Ningun di nos ta adivino pa por pronostica di awor caba e resultado. Falta hopi incognita pa dilucida, y cu e paso di tempo e panorama lo haya mas claridad. Den e momentonan actual, sinembargo, e partido cu ta perfilando su mes cu mas potencial ta keda AVP. Mientras tanto, ban goza di carnaval y entrega nos mes na e alegria cu e ta produci y e satisfaccion di por participa como un parti activo di dje o como miron, den un di e eventonan mas grandioso di nos isla.

- Advertisement -

DUNA COMENTARIO

Please enter your comment!
Please enter your name here