Home Editorial Editorial: INDISPUESTO OF INCAPAZ?

Editorial: INDISPUESTO OF INCAPAZ?

0
0
SHARE
- Advertisement -

Mi  no sa cuanto hende por ta di acuerdo cu mi, pero e cantidad no ta importante, e calidad si! Tin varios fenomeno cu ta preocupami, no pasobra nan no tin solucion, pero pasobra mi no ta mira sikiera e intencion di bay den e direccion absolutorio di e fayonan. Y den esey tin un Ministro cu merece tur e peso di e criticanan cu ta bin al caso. Lo mi trate un poco mas adilanti den e editorial aki. Den su aspecto global, e Gobierno actual tin su meritonan, y lo mi tribi di bisa, hopi grandi, pero e tin tambe su fayonan, por ta no mes grandi cu su meritonan, pero cu di tur manera ta tira un sombra riba su maneho. Algun di e cosnan cu e ta haciendo ta parcemi descabeya, pa no usa otro termino inadecuado. Nan ta debi na sea indisposicion o incapacidad!

                Ta masha bunita bin cu e vision di un Aruba nobo y moderno, pero con bo por ekipare cu un sistema di transporte anticua, cu a desaparece na hopi parti di mundo pa habri caminda pa metodonan mas moderno? Y mi ta referi aki na e tram, o trein, o trolley, o streetcar, con cu bo kier referi na dje. Claro cu e ta capta atencion na un cuminzamento, y ta hala hopi mirada di orguyo y satisfaccion, pero tur esey ta pasahero y e realidad ta keda di un caya grandi paraliza largamente, flankea pa negoshinan cu ta sufriendo durante basta tempo caba pa motibo di e trabaonan preparatorio pa señorita tram keiro cu su mironnan. Pero, e pensamento fundamental tocante e tema aki ta: ki beneficio e ta bay aroha pa nos isla? Con ta bay recupera e fortuna cu a inverti den dje? Pasobra, ban ser franco cu otro: e inversion ey no ta uno recuperable, o sikiera reproductor. E ta djis un gasto grandi cu a causa (y ta sigui causa) hopi iritacion den e chofernan cu mester usa e vianan cu el a invadi pa yega na nan trabao, y djey di retorno pa nan hogarnan. E ta un situacion hopi fastioso pa un trafico cu ta pega na cualke hora di dia, y ta crea, ademas di un devastacion emocional,  filanan largo di autonan desespera pa yega na nan destino.

                E di dos topico cu mi kier abarca ta e criminalidad indiscrimina cu a invadi nos isla y cu no ta parce di tin fin. Y pa enfrenta e fenomeno desagradable aki, ken e partido den Gobierno a scoge pa hacie? Un  neofito completo den e materia; un persona cu a convence su mes cu arogancia por ta un subsituto pa decisionnan y accionnan decisivo. Y no ban papia mes di enseñanza, cu ta pasando den un di su peor momentonan. Ora un dak a bin abao na un school di muchanan chikito, unda nan ser manda? Pa un centro comercial completamente inadecuado pa e proposito. Mi no sa cuanto tempo mas Mike por aford di mantene e candidato ey den e puesto, pero si ta perde e kier perde votonan den e eleccion actual, lague sigui mira den otro direccion y haci comosifuera tin un bon conduccion di Husticia y Enseñanza. E record di e Ministro ey , segun tur evidencia visible, ta asina malo cu e ta capaz di haci hasta e mas balente yora di frustracion! Parce cu e no tin ni e temperamento ni e intelecto pa ehecuta su funcionnan adecuadamente.

                Pa mi, no tin nada mas bergonzante cu un politico cu ciegamente ta propaga su incapacidad, y ta sintie confortable cu su incompetencia. Y pa colmo, mi no ta nota ningun prisa den e partido cu a pone pa coregi e situacion. Ami no ta bay haci e trabao di MEP y PDR pa nan, aunke mi por hacie cu hopi exito, pero den mi huicio, o nan ta tumando un siesta largo, o nan ta formulando plannan a mediano plazo pa confronta e problematica aki di Gobierno cu argumentonan pisa y presion iresistible. Si esaki ta e caso, miho nan pura pasobra no ta posible congela e mannan di holoshi pa nan no sigui cana.

                Cu turismo, Gobierno a saca e premio mayor, pasobra el a scoge un Ministro cu si a pone su curazon den su tareanan y no ta spar su mes esfuerzo pa sigui mehora e industria te unda cu ta posible. Danki na dje, Gobierno por broma cu un exito rotundo, pasobra Otmar a demostra cu e si por maneha su carteranan cu gran exito, y ta empeña pa sigui den e rumbo di progreso cu ya el a implanta caba. E merece tur clase di elogio, y di mi pati, sigur e ta haye publicamente!

- Advertisement -

DUNA COMENTARIO

Please enter your comment!
Please enter your name here