Home Editorial Editorial: MEP TA BUSCA PROBLEMA INNECESARIO

Editorial: MEP TA BUSCA PROBLEMA INNECESARIO

1
0
SHARE
- Advertisement -

            Cu basta asombro mi a lesa un comunicado di prensa di MEP den cual nan ta ataca Prome Ministro, Interbank y parti di nos famia directamente. Ami lo a prefera di no participa den e eleccion aki, pero parce cu esey no ta bay ta posible, considerando e nivel atrobe mes baho cu di custumbra di un partido cu tin tur cos di perde y nada di gana cu su atakenan personal y infunda. Mi no sa ta di unda e partido a saca su informacionnan tocante Interbank y FCCA, y ni pakico nan ta alega cu tin “cierto famianan cu mester a bay cera,” pero mi ta supone cu nan lo a mira nan caranan den spiel, pasobra si tin un grupito di malhechor cu mester a bay lombra wowo tras di trali ta e integrantenan di MEP den e Gobierno cu durante 8 aña a haci desastre cu e propiedadnan di Pueblo.  Ta danki na e indiferencia di un par di Fiscal cu a kere cu nan a bin Aruba pa pasa un par di aña di vacacion den un zona tropical,  nan a logra scapa (temporalmente) di  husticia.

            Mi no ta bay ripiti awor loke tur hende sa, y ni tampoco enfatiza con e cosnan a tuma lugar y kendenan personalmente tabata envolvi, den e cuestion di huurnan exorbitante y sin fecha di vencimento, ni e desastre cu terenonan y otro propiedadnan di Pueblo, y ni sikiera e nepotismo practica sin reserva durante e periodo ey. Pero, como cu nos tin nos dilanti un caminda basta largo pa cana te dia di eleccion, permitimi recorda e buscadornan di problema cu nos sa hunga e wega politico aki hopi bon. Djis tira un bista den pasado y saca boso conclusionnan.

            Mi ta lamenta cu pa yega na Prome Ministro mester a inclui algun miembro di nos famia como parti di e makiavelismo di MEP, pero ya cu e provocacion a ser lanza directamente den nos direccion, ta mas cu claro cu nos ta acepta e reto y ta bay prepara nos mes pa un guera sin cuartel contra un partido cu no tin ni e mas remoto posibilidad di yega cerca di un triunfo electoral, corda pa entretene e speranza (o ilusion) di un victoria.

            Mi no tin nada personal contra Evelyn, ni e otro integrantenan di MEP, pero mi a spera un otro actitud den e liderazgo di e partido, uno mas dirigi riba e problemanan serio cu nos ta enfrentando y cu ta bay empeora cu e paso di tempo, no e deseo di venganza pa un eleccion cu nan a perde malamente cuatro aña pasa. Tempo ta bay y no ta bolbe. Loke a pasa, a pasa y no ta bay cambia, ni cuanto empeño bo pone pa cambie. Ta masha bobo di parti di MEP di bin purba usa “friends and family” como un arma politico den e eleccion aki, pasobra e no ta un match pa kendenan ta berdadero profesornan den e materia. Si MEP djis tira un bista rond di Aruba su wowonan obligatoriamente lo topa cu hopi asunto cu merece un atencion rapido, y no sinta perde su tempo buscando problema cu kendenan no tabata tin ni sikiera e deseo di participa den e debatenan cu ta bay tuma lugar. E ta un eror cu ta bay sali e partido caro.

- Advertisement -

DUNA COMENTARIO

Please enter your comment!
Please enter your name here