A tene e desaroyador responsable pa claimnan miyonario:
ORANJESTAD (AAN) — Den conferencia di prensa semanal di Fraccion di Partido Democracia Real, mr. Andin Bikker, a reitera cu e parke di mulina di biento na Maastricht a wordo para pa aspectonan di salud.
Segun informacion preliminario obteni awe mainta di un di e Parlamentarionan di gemeenteraad Maastricht cu kende PDR lo reuni durante e bishita na Hulanda, e parke di mulina di biento na Maastricht a wordo para pa aspectonan di salud, pero tambe pasobra a tene desaroyador responsable pa claimnan miyonario door di e desaroyadornan di cas den e area. Mr. Andin Bikker a cita e siguiente parte relevante:
“Overigens is het windmolen project ook niet doorgegaan omdat de gemeente alle schade die zou ontstaan door het plaatsen van de windmolens op Imtech afwentelde. Tijdens de hoorzitting kwam naar voren dat een projectontwikkelaar al voor een dik mln aan schadevorderingen zou indienen omdat hij zijn huizen dan niet meer zou kunnen verkopen.(…).”.
Na Papiamento por traduci esaki: “Por remarca cu e proyecto di mulina di biento tambe no a sigui pasobra e Municipio a tene e desaroyador responsabel pa tur daño cu e proyecto por a trece cune. Durante e reunion a sali na cla cu un solo desaroyador di proyecto di cas ya a indica cu lo entrega un claim di un miyon pasobra e no por bende su casnan mas.”
Cu otro palabra na Maastricht a tene e desaroyador responsabel pa tur daño cu e proyecto lo por trece cune. Aki na Aruba ta carga e desaroyador den teblachi, lague rosa y bora sin cu a cambia e destinacion di e area, y ta pasa e posibel risico y daño di e proyecto pa nos Pueblo. E informacion adicional di Maastricht mester ta un wake up call pa Gobierno di Aruba y WEB NV pa para e proyecto y explora otro alternativa prome. Alternativa tin: PDR a wordo presenta cu un proyecto diseña na Aruba mes cu ta traha riba energia di stroming nautico, cual ta costa menos cu e proyecto di mulinanan di biento y ta duna mas energia, esta minimo 50 megawatt. PDR lo bay purba arrange un meeting di introduccion entre e desaroyadornan y WEB NV pa WEB por informa su mes riba e posibel proyecto ey. Los di esey WEB NV mes a yega di indica cu door di avancenan tecnologico kizas por tin otro alternativanan cu nan mes ta studiando di cerca.
