ORANJESTAD (AAN): Durante reunion cu tur e cardinalnan dialuna na Vaticano, Papa Benedicto XVI di 85 aña di edad a anuncia su retiro entrante dia 28 di februari 2013.
E no tin ni 8 aña den funcion y ta bira e prome Papa den 600 aña pa tuma su retiro asina lihe. Durante e reunion e Sumo Pontifice a bisa e Cardinalnan cu el a yega na e decision aki despues di a samina su consenshi dilanti di Dios.
E ta convenci di no tin forsa mas, debi na su edad avansa, pa por ehecuta su funcion den un forma adecua. E ta na cabes di religion Catolico, cu mas di 1 biyon siguido na mundo.
Papa Benedicto XVI ta conoci pa un figura masha conservativo mes, asina mes su temporada na cabes di Misa Catolico a conoce hopi reto.
Specialmente di escandalonan di Pastornan cu a abusa sexualmente di menornan di edad. Su demas coleganan Cardinal a eligi Joseph Ratzinger dia 19 di april 2005 como Papa Benedicto XVI, despues di fayecimiento di Papa Juan Pablo II.
Pa awor, Papa Benedicto XVI lo sigui den su posicion di Papa te dia 28 di februari. Despues di esey su sucesor lo yena e bashi cu e lo laga atras mientras cu Misa Catolico ta spera di por nombra un Papa nobo riba Pasco Grandi, esta dia 31 di maart proximo.
Aunke cu un vocero di Vaticano a bisa e fecha ainda ta un “hipotesis”, pues cu e no ta totalmente confirma ainda. E anuncio aki a cay di sorpresa pa tur hende, hasta pa e Prome Minister di Italia y pa e vocero di Vaticano. Net na momento cu tur Cardinal tabata na Vaticano, el a dicidi di haci anuncio di su retiro den apenas dos siman di tempo.
Papa Benedicto XVI a haci su anuncio den e idioma Latin, pero mesora a traduci su declaracion den 7 otro idioma, esta Italiano, Frances, Ingles, Aleman, Polaco, Portugues y Spaño.
Na Papiamento e lo a bisa “Den e mundo di awendia, nos mester ta habri pa hopi cambio, anto den forma rapido, y sacudi pa preguntanan di relevancia profundo relaciona cu nos bida di fe, mi ta kere cu pa por goberna e barco di San Pedro y proclama e gospel, ta necesario pa tanto bo mente como bo curpa fisico ta den bon condicion y ta fuerte. Mi mester bisa cu e mesun forsa ey a deteriora den mi durante e ultimo lunanan, asina tanto cu mi mester a reconoce mi incapacidad pa eherce mi funcion cu e Ministerio a confiami cune den forma adecua. Ta pa e motibo aki, y bon consciente di e seriedad ci mi acto, cu tur e libertad cu mi tin, mi ta declara cu mi ta renuncia e Ministerio como Obispo di Roma, sucesor di San Pedro”.
Te ainda no tin un favorito pa tuma e funcion di Papa di Misa Catolico, pero ta mencionando nomber di algun Cardinal caba, manera ta Cardinal Angel schoola di Milan, Cardinal Christoph Schoenborn di Vienna y Cardinal Marc Ouellet di Canada. Durante un conferencia di prensa na Vaticano, e vocero di Misa Catolico a bisa cu Papa Benedicto XVI no tabata emociona durante su anuncio na e Cardinalnan. Al contrario, ta considera cu durante su discurso el a sa di demostra hopi dignidad, concentracion y hopi comprension pa e nificacion di e momento”.
