Analisis politico

Publication: Monday, 4 March 2013. Categoria: Politica

Nel y Evelyne

E situacion den MEP ta keda exigi atencion pasobra e cambionan cu ta bin  despues di proximo eleccion ta importante pa nos pais. Nos a yega di enfatiza cu e MEP di awe nunca mas mag bin den gobierno di Aruba pasobra nan actitud a keda mescos cu e tabata den pasado. E mentalidad di e dirigentenan cu tin awe ta mescos of pio di loke e tabata durante 8 aña di gobernacion di MEP.

     E rabia cu a keda den mente di e lidernan di e partido aki pa motibo cu pueblo a castiga e mal gobernacion na un manera sumamente fuerte den ultimo eleccion lo tin e consecuencia cu un MEP den gobierno atrobe lo ta feroz. Mirando e desaroyonan den MEP mes ta duna nos e siguranza cu e MEP di awe lo no haya sosten pa por drenta un gobierno nobo. E situacion cu nos a splica siman pasa ta cu siete di e top dieznan representando mas cu mitar di e votonan di MEP no ta ariba lista mas. Un di e sietenan Booshi ta vrij Evelyne intesivamente pa drenta MEP back pasobra e sa cu ariba su mes si e mag bay mes e lo no saca un asiento.

   E desaroyo entre Booshi y Evelyne mester worde sigui di cerca. Un di e factornan nobo den MEP cu ta importante ta e kiebra cu ta mustra cu tin entre Nel Oduber y Evelyne Wever Croes. Te poco tempo pasa cada pasa un paar di dia nos tabata tende Nel Oduber comenta den medionan di publicidad ariba e decisionnan cu Evelyne tabata tuma.  

     Su critica tabata basta pisa pero tabata keda si dentro di lo ta acceptabel pa ambos. Awo si ta parce cu Evelyne a ofende Nel asina pisa cu e a hala atras y nos no ta tende nada mas di dje.  E problema aki por bay causa MEP un perdida ainda mas grandi pasobra Nel tabatin mas cu 6000 voto ariba su nomber den ultimo eleccion. Si Nel dicidi cu e no ta di acuerdo cu e liña di Evelyne esaki lo ta catastrofal pa e MEP di Evelyne. E acusacion cu Evelyne a manda  pa Nel ta uno sumamente grandi solamente pa Evelyne trata di hustifica un politica puramente oportunista encuanto e molinanan  di biento na Urirama y  Vader Piet San Nicolas.

    Evelyne su posicion tabata cu Nel Oduber lo a usa e situacion di Sanicolas como “proef konijn” cu e molinanan sin tene cuenta cu salud di e habitantenan di e sitio ey. E acusacion aki ta hopi serio y si Evelyne no haci algo den esaki su futuro politico ta bira mas scur cu e ta caba. Un pelea formal entre e ex lider di MEP y e actual lider di MEP ta loke nan falta den e partido aki pa casi desaparece den proximo eleccion.

    Evelyne mester di cada pida di ayudo cu e por haya y un confrontacion manera e ta mustra di ta na caminda ta bay ta fatal. E ta mustra si na un manera cla cu no tin ningun coherencia mas den MEP y cada paso cu ta worde tuma ta inspira ariba loke ta mustra oportuno na e momento ey sin tene cuenta cu e consecuencianan cu esaki ta bay tin. Berdad ta cu ta pa hopi aña cu Nel Oduber no ta parti un pan cu famia Croes pero di un of otro manera nan a logra di convence Nel pa laga su sosten pa Booshi Wever cay na fabor di Evelyne.

    Na cada accion te poco dia pasa cu Evelyne tabata organiza Nel tabatey ta blaas ariba su fluit pero den e ultimo demostracion Nel no tabata presente. Esaki mientras Evelyne a haci e molinanan di Urirama un issue politico grandi pa su partido. Nel enfaticamente tabata ausente. Awo cu e manera cu Evelyne a ofende Nel por ta cu cosnan ta cambia y Nel ta laga Evelyne pa su cuenta. Sigur ta cu tin sicatriz profundo cerca Nel pa motibo di e pelea mahos cu tabatin pa liderazgo di MEP.

    Nel mester a laga su candidato pa lider Booshi Wever cay pa Evelyne por a gara e poder den partido. Nel no por lubida esaki y awo cu Evelyne a ataca Nel frontal e dolor a hincha atrobe. Nos mester tene e desayo aki bon na bista.

Leave a Reply