Home Politica Cu salida di Lainda Westerhof AVP a perde un di su miho...

Cu salida di Lainda Westerhof AVP a perde un di su miho parlamentarionan

12
0
SHARE
- Advertisement -

Lider di MEP Evelyn Wever-Croes

ORANJESTAD    (AAN):  Den conferencia di prensa di MEP, lider di MEP a comenta riba e salida di Lainda Westerhof di Parlamento: “Nos a tuma nota di e noticia di señora Lainda Westerhof su decision di bandona politica. Esaki a cai manera un sorpresa, especialmente pasobra apenas algun siman pasa el’a anuncia su campaña, y a distancia su mes di e politica bow nivel di mayoria di su coleganan. Esey a duna hopi speranza cu cosnan lo cambia den futuro pa e fraccion di AVP. Awor nos sa cu esaki lo no pasa.

   E motibonan nos no ta compronde mucho bon, y mi lo no specula riba nan. Sigur nos lo no comenta riba problemanan interno di partido AVP, pasobra ta asuntonan cu nan mester atende interno cu otro. No manera nan a usa nos problemanan interno pa haci politica barata. Mi mester bisa si cu e reaccion di Prome Minister Mike Eman na television a trece mucho mas duda riba henter e situacion.

   Pero cualquier cu e motibonan ta, e mester tabata un decision dificil pa tuma. Pasobra una bes bo tuma e decision di drenta politica, pa representa bo pueblo, bo ta tume hopi na serio. Pa bandona e pasion aki, mester ta hopi mas dificil. Den señora Westerhof Parlamento, y especialmente fraccion di AVP, ta perde un di su mihor parlamentarionan, sigur e mihor parlamentario femenino. Señora Westerhof semper a trata na hiba un politica riba un cierto nivel, y al caso. E no ta papia pa papia, y no ta sinta tira palabra manera su otro coleganan, especialmente femenino. Y e ta comporta su mes manera un dama.

   Mi mester dune compliment atrobe pa e forma con el’a atende e asunto di asbest di Mon Plaisir School, el’a pone interes partidario di su partido un banda y a exigi pa tur su coleganan pensa riba e bienestar di e muchanan prome. Esey ta algo cu ta tuma hopi curashi. Nos fraccion a expresa fuertemente cu mester saca e muchanan di e school, y nos a logra tambe danki na sus sosten.

   E salida di señora Westerhof ta un paso gigantesco atras pa e fraccion berde, y especialmente pa representacion di hende muhernan cu a pone nan confianza den AVP. Nos ta desea señora Westerhof hopi forsa den e temponan dificil aki, y hopi exito den futuro.

- Advertisement -

DUNA COMENTARIO

Please enter your comment!
Please enter your name here