Gobierno di Hulanda a cuminsa Promocion Grandi pa Aruba como Gateway

Publication: Monday, 4 March 2013. Categoria: General

Agentschap NL di Minister di Relacionnan Exterior promoviendo Europe Meets Americas!

ORANJESTAD    (AAN):    Na luna di mei e conferencia internacional “Europe meets the Americas” ta tuma luga na Aruba. Expectativanan ta halto pa e conferencia aki na unda empresario y inversionistanan tanto local como internacional ta participa pa intercambia di pensamento cu otro y na mes momento cera acuerdonan valioso.

    For di inicio di gobernacion di Gabinete Mike Eman e idea a keda lansa pa converti Aruba den un ‘gateway’ pa Europa, Latino America y vice versa. Un concepto cu mesora a cay den bon tera y a haya bon acogida cerca inversionistanan local, di Hulanda y Europa.

    Un tremendo  concepto cu ta bon pa Aruba y su hendenan. Un oportunidad cu mester wordo gara cu dos man. Gobierno di Hulanda a cuminsa promociona e conferencia aki. Riba e website di Asuntonan Economico di Exterior inversionista, empresario y otronan ta wordo encurasha pa participa na e conferencia di sumo importancia aki, na unda nan ta topa cu otro inversionista y empresario.  

    Di 5 pa 8 di mei binidero Aruba y Hulanda ta organisa e conferencia ‘Europe meets the Americas’. Esaki ta tuma luga na Aruba. E conferencia aki ta enfoca riba e oportunidadnan cu tin riba mercadonan den Latino America cu ta creciendo rapidamente y con gara e oportunidadnan aki.

    E conferencia ta resultado di un protocol di cooperacion cu ta unico den Reino cu a wordo firma entre Aruba y Hulanda na 2011. Den su articulo promocional Ministerio di Asuntonan di Exterior ta skirbi. ‘Bo kier haci negoshi cu Latino-America y en particular cu negoshinan di Aruba, Brazil, Colombia, Costa Rica, Mexico, Panama y Venezuela?

    Participa e ora den e mision economico pa Aruba dianan 5 te cu 8 di mei bou guia di Simon Smits, director-general di Asuntonan Economico di Exterior di Ministerio di Asuntonan di Exterior. Pa medio di e paisnan aki bo tin un potencial alcance di mas di 400 miyon di consumidor’.

E Conferencia EMA ta enfoca riba e siguiente sectornan:

• Tecnologia duradero (energia, mineria, agricultura, infrastructura, transporte)

• Logistica y infrastructura (deposito, distribucion, explotacion, waf, aeropuerto)

• Turismo (formacion)

• Servicio Financiero y sosten pa negoshinan

• Awa ( y construccion hidraulico)

• Retail

    E mision aki ta ofrece un oportunidad unico pa for di un solo localidad dentro di Reino pone contactonan cu potencial partnernan di negoshi y consumidornan den Latino America y Aruba. Embahadornan di Reino y algun consul general di e region tambe ta participa na e Conferencia EMA. Pa diferente sector tin banda di participacion na EMA tambe un matchmaking individual riba programa.

Preparacion pa e conferencia ta canando bon cu un gran cantidad di participante cu a registra caba.

Leave a Reply