Gobierno ta aproba Presupuesto 2013

Publication: Monday, 4 March 2013. Categoria: General

Proyecto di ley lo cuminsa su trayecto legislativo

ORANJESTAD   (AAN): Diabierna mainta Conseho di Minister a aproba e presupuesto 2013, caminda cu Gobierno di Aruba a sa di mantene su mes dentro di e cuadro financiero. “E deficit financiero di  presupuesto pa aña 2013 ta proyecta di bira 223 miyon di florin – nificando un reduccion considerabel di 184 miyon di florin di loke a ser hereda na final di 2009”, minister De Meza a declara.

    Gabinete Mike Eman comprometi di hiba un finanza publico responsabel a sa di mantene e trend di reduccion di deficit den liña cu e cuadro financiero durante e ultimo añanan. For di un situacion di deficit financiero iresponsabel y tambe e fondonan publico den estado critico, a logra baha e proporcion di e deficit compara cu nos GDP di 9.4% na 2010, pa 7,1% na 2011, pa 5.6% na 2012 y awor pa 4.5% na aña 2013. “Na aña 2014 e deficit lo yega na e norma internacional di 3% compara cu GDP”, minister de Meza a splica. Pa aña 2013 ta calcula un crecemento economico di 3.5% mirando e desaroyonan positivo continuo den turismo y tambe ehecucion di proyectonan.

    Danki na e esfuerso di Gabinete Mike Eman e entradanan di Pais Aruba a conta cu un suma di 210 miyon florin adicional procedente Valero na 2010. Den e presupuesto di aña 2011 Gobierno di Aruba a conta cu un deficit financiero di 340 miyon florin cu a significa un reduccion di mas cu 60 miyon florin compara cu aña anterior. Gabinete Mike Eman comprometi di hiba un finanza publico sostenibel y responsabel a bolbe reduci e deficit na aña 2012 cu 70 miyon florin yegando na un deficit financiero di rond di 270 miyon florin a pesar di e suspension di e actividadnan di e refineria. Cu hopi satisfaccion por bisa awe cu e deficit financiero pa 2013 ta 223 florin – 50 miyon florin menos cu aña pasa.

    Na aña 2010 e deficit financiero lo a suma casi 500 miyon di florin manera cu a wordo laga atras pa gabinete anterior. “A bin encontra un finanzas publico for di control, un fondo di pensioen den un estado hopi critico, un economia den recesion y falta di dialogo den comunidad y tambe cu partnernan strategico”, minister De Meza a elabora. “A pesar di e retonan aki Gabinete Mike Eman logra cambia e tendencianan negativo encaminando e Dialogo Social cu ta conta cu cinco protocol cu ta atende asuntonan socio-economico, financiero,  pensioen y tambe di energia.“ E plan di estimulo economico cu fin di mehora poder di compra y tambe pa recupera economia a contene inversionnan amplio riba tereno di  infrastructura, urbanisacion y tambe energia alternativo. E plan ta encera un total di 1.2 biyon di florin na proyecto cu lo wordo ehecuta pa Gobierno, sector priva y tambe den cooperacion publico-priva.

    Gabinete Mike Eman a sa di reduci e deficit financiero di un manera structural, sin paralisa e actividadnan economico creando asina confianza den nos economia. Esaki a wordo reconoci tambe pa e.o. FitchRatings y Standard & Poor’s. “Lo tabata hopi facil pa introduci medidanan pa asina yega na un presupuesto balansa di biaha”, e mandatario ta sigui splica. “E maneho di Gabinete Mike Eman sinembargo a opta pa stimula economia, yuda esnan cu menos entrada y bin cu solucionnan structural pa e situacion di APFA, AZV, e fondonan di SVB y tambe FATF, sin introduci medidanan pa tranca e desaroyo economico di nos pais.” Internacionalmente hopi gobiernonan ta reconoce e hecho cu un maneho di austeridad estricto y introduccion di medidanan pa aumenta entradanan publico, no ta duna fruto.

     E entradanan total pa aña 2013 ta suma un poco pas cu 1.1 biyon di florin, mientras cu e gastonan ta suma 1.3 biyon di florin. Como cu e actividadnan economico ta mas abou cu a ser premira pa motibo di e suspension di e refineria for di september 2012, esaki tabata su efecto riba e pronosticonan financiero pa aña 2013. Hunto cu e partnernan di Dialogo Social a sa di yega na acuerdonan pa reduci gasto, como tambe aumenta entrada di Pais Aruba. E crecemento den turismo y tambe e efectonan di e plan di inversion di Gobierno Aruba ta forma un base solido pa limita e perdida den entradanan total.

     “Nos ta responsabel den calculacion di nos entradanan y no a conta cu entradanan ireal manera nos antecesor nan”, Minister de Meza a splica. Pa aña 2013 Gobierno a sa di reduci su gastonan pa mantene e deficit financiero a pesar cu e actividadnan economico tabata menos cu a ser premira na inicio di aña.

    Continuando cu e vision y determinacion di un bon Gobernacion den e presupuesto di aña 2013 a logra mantene e gastonan di gobierno bou di e nivel di aña anterior y a reduci e deficit un bes mas manera prescribi den e cuadro financiero.  For di oficina di Gobernador di Aruba e proyecto di ley, unda e presupuesto ta hancra aden, lo bay Raad van Advies y asina cuminsa su proceso legislativo. E presupuesto ta fiha e maneho di Gabinete Mike Eman pa aña 2013 y ta keda ampliamente dentro di e cuadro financiero demostrando asina un maneho financiero responsabel, structural, cargabel y sostenibel.

Leave a Reply