ORANJESTAD (AAN) – Pa Iglesia Catolico Siman Santo ta e temporada di mas intensivo di e aña liturgico. No obstante, tin un cantidad grandi di personanan Catolico, pa kendenan Siman Santo ta un vacacion pa tuma descanso, y mas ainda pa diverti.
Tin hopi pais unda cu for di Diaranzon Santo anochi, famianan ta cuminza viaha bay na e areanan sea di lama y santo of montaña, unda cu tin areanan berde.
Na Aruba, tambe tin e custumber di bay campa na cant’i lama durante e dianan aki y e siman cu ta sigui cu tampoco tin school.
Por ripara cu for di varios aña caba, hopi Catolico ta lubida di e esencia di Siman Santo. E esencia ta dedica na oracion y reflexion riba e Pasion, Morto y Resureccion di Cristo.
Biba e Siman Santo kiermen enfoca e parti aki di e bida di nos Salvador, cu a bin na mundo pa redimi nos, picador. Dios mester ocupa e lugar central den Siman Santo, y esaki no ta conta pa Catoliconan so pero pa otro nominacionnan Cristian cu ta kere cu Jesus a muri pa nos picanan, cu el sufri e caminda di Cruz y cu el a resucita, y di hecho tin varios otro religion Cristian, cu ta warda e dianan aki.
Hopi ta yama e Siman Santo “Siman Mayor” y el a cuminza caba Diadomingo di Rama unda cu nos ta acompaña Jesus pa medio di e Santo Sacrificio di Misa, pa medio di e oracionnan particular cu nos ta haci (por ehemplo reza e Caminda di Cruz na cas mes den famia), ofrece sacrificio manera no come carni cora riba Diabierna Santo, tene ayuno y abstinencia, confesa nos picanan na un forma sincero y arepenti di nan, y hopi importante compronde pakico el a sufri, muri y resucita. Siman Santo ta e ultimo siman cu Jesus a pasa riba e mundo aki, y su resureccion ta corda nos cu e ser humano a ser crea pa biba eternamente hunto cu Dios Tata, Dios Yiu y Dios Spirito Santo.
