Segun Centro NCH:
ORANJESTAD (AAN): E interes pa e conferencia ‘Europe meets the Americas’ cu ta worde teni na cuminsamento di luna di mei na Aruba, ta grandi bou di empresanan Hulandes. “Hendenan ta entusiasma.
Companianan interesante a inscribi nan mes caba”, asina director general Jan Siemons di NCH (Nederlands Centrum voor Handelsbevordering) a bisa durante su encuentro na Den Haag cu Prome Minister di Aruba Mike Eman y Minister de Meza.
NCH a haya e peticion di gobierno Hulandes pa recluta participantenan pa e conferencia ‘Europe meets the Americas’, un cooperacion cu ta pas den cuadro di e protocol di cooperacion cu Aruba a cera cu Hulanda na 2011.
NCH ta un partner importante: E ta e plataforma pa e 24.000 (!) empresanan Hulandes cu ta internacionalmente activo of cu kier ta activo internacionalmente.
E organizacion ta boga pa realisa relacionnan comercial entre Hulanda y mercadonan di exterior cu e meta pa fortifica e posicion internacional di e mundo empresarial Hulandes. Director Siemons di NCH a keda encanta cu tanto e concepto Gateway Aruba como e iniciativa pa e conferencia na luna di mei. Un team di NCH ta trahando duro acercando companianan Hulandes pa informa nan di e importancia pa bay Aruba y participa activamente na e conferencia ‘Europe meets the Americas’.
”Latino-America ta brinda oportunidadnan grandi pa companianan Europeo. Nan mester wak si den e direccion ey, pasobra tin hopi crecemento, pero e paso ta grandi. E empresanan mas grandi ta tuma e paso ey, pero mi ta ripara cu tin hopi incertidumbre cerca companianan mediano. Nan ta insigur pa motibo di e diferencianan den cultura, pero ta haya dificil tambe pa haci e escogencia: ‘Mi ta cuminsa na Brazil of toch prome na Colombia?’ Pa e empresanan ey Aruba por hunga un rol importante. Nan ta en busca di ‘comfort’ y Aruba ta brinda esey. E empresanan aki por cuminsa cu un oficina cu ta representa nan na Aruba pa di eynan, for di un ambiente conoci, sigur y stabil traha riba e paisnan den e region haciendo uzo di e netwerk pa siña conoce e manera di traha di paisnan Latino-Americano”, Siemons a bisa. E ta convenci cu den e mundo empresarial Aleman y Ingles tambe tin interes pa e concepto Gateway Aruba.
Muestra di e interes grandi di Siemons kende kier mira e conferencia ‘Europe meets the Americas’ ta exitoso, ta su promesa pa prome cu e conferencia tuma luga na luna di mei pa organiza na Hulanda un encuentro adelanta pa e empresanan pa prome cu nan bay Aruba, nan ta bon prepara. Tambe el a ofrece den forma espontaneo pa comparti experticio di su organizacion cu Aruba Investment Agency (Arina), door di por ehempel duna trainingnan. Prome Minister Mike Eman “Ta algo fantastico cu nos por conta riba e sosten completo di un organizacion renombra manera NCH. E ta kere den nos vision pa posiciona Aruba como un hub entre Europa y Latino-America y ta compronde exactamente unda nos balor adicional ta sinta. Di e manera aki nos ta haci e balor extra di ta partner den Reino mas y mas visibel. E cooperacion cu NCH no ta caba despues di e conferencia. ‘Europe meets the Americas ta hustamente e punto di salida di un relacion duradero di cua e economia Hulandes y di Aruba por probecha”.
