John F. Kennedy School a crea trabao pa tur sector laboral na Aruba

Publication: Monday, 4 March 2013. Categoria: General

Ex director y docente ta recorda temponan agradabel di antes 

Renobacion di e compleho ta cay den masha bon tera cerca ex-docente y alumnonan

ORANJESTAD    (AAN):   Gabinete Mike Eman kier cumpli cu e deseo di miles di hende cu ta desea di mira e scol tecnico John F. Kennedy cu a sirbi pa educa un gran cantidad di persona keda pa semper den comunidad di Aruba. E edificio ta wordo completamente renoba, no pa fungi como un instituto educativo, pero ilustrando su importancia a dune e destinacion na unda departamentonan di Ministerio di Enseñanza ta bin.

     Ex-docente y -director Rudy Frank y Mario Middendorp, di studiante pa maestro di e scol aki, tin e pensamento comun cu John F. Kennedy School (Scol Tecnico) a sirbi su meta pa prepara miles di hoben, pa drenta e forsa laboral di Aruba durante un periodo basta largo.

Inicialmente Aruba tabata conoce ‘Vocacional School’ di LAGO cu tabata prepara hobennan pa traha den e refineria, pero durante añanan 50 Aruba mes a tuma e responsabilidad pa forma tecnico di hobennan na Aruba. E dos docentenan aki, a subraya cu loke a cuminsa como Arubaanse Technische School, e basico di ofishinan tecnico, a crece bira LTS, UTS y despues pa un periodo cortico MTS. E scol cu a cuminsa solamente pa mucha homber y pa añanan 80 a muchanan muhe tambe a cuminsa formacion tecnico na John F. Kennedy School.

    Contrario na loke hopi ta kere, segun ex director Rudy Frank, John F. Kennedy School a prepara hobennan cu despues a bay traha den diferente ramo, no unicamente den sector tecnico. Tabatin hobennan cu a finalisa nan MULO, manera Mario Middendorp pa despues a bay John F. Kennedy School y sigui profesionalisa su mes pa duna les na e scol cu el a atende. Pues, “John F. Kennedy School a sirbi su meta di a educa y inculca disciplina den milesa hoben aki na Aruba,” Frank a duna di conoce.

    Pa motibonan di siguridad y practico, na inicio di añanan 90, a cuminsa pensa riba un reformacion di e sistema di enseñansa aki, den un bachi nobo y na un otro area. E motibo ta cu e pista di aeropuerto a wordo alarga y e sonido di avionnan tabata haci imposibel cu lesnan por a wordo duna sin interupcion. Asina a surgi e prome Educacion Profesional Basico (EPB) cu awe ta na Hato cu ta cumpliendo denter di dos aña nada menos cu 20 aña di existencia.   

     Recientemente Gabinete Mike Eman a presenta e plannan pa restaura y amplia e edificio di John F. Kennedy School como parti di un plan mas amplio di renoba y revitalisa Aruba su infrastructura neglisha. E proyecto aki a wordo ricibi cu masha emocion cerca esnan cu a duna les eynan pero tambe cerca esnan cu a haya nan educacion na e instituto aki. Probablemente, despues cu e proyecto pasa den Parlamento den e periodo nos dilanti, e ta bay destaho publico pa e trabou di construccion y restauracion por cuminsa.

 

Leave a Reply